ప్రైవసీ పాలసీని తాత్కాలికంగా నిలిపివేస్తున్నాం.. వాట్సాప్ సంచలన ప్రకటన!

భారతీయ చట్టాలకు అనుగుణంగా వ్యక్తిగత గోప్యత పరిరక్షణకు కట్టుబడి ఉంటామని కేంద్ర ప్రభుత్వానికి వాట్సాప్‌ ఇటీవల స్పష్టం చేసిన విషయం తెలిసిందే.

ప్రధానాంశాలు:వివాదాస్పదమైన వాట్సాప్ కొత్త విధానం.భారత చట్టాలకు కట్టుబడి ఉన్నామని ప్రకటన.కస్టమర్లను బలవంతపెట్టబోమన్న వాట్సాప్.వివాదాస్పద గోప్యతా విధానం (ప్రైవసీ పాలసీ)ను తాత్కాలికంగా నిలిపివేసినట్టు సోషల్ మీడియా దిగ్గజం వాట్సాప్.. ఢిల్లీ హైకోర్టుకు శుక్రవారం తెలిపింది. ఫేస్‌బుక్‌తో డేటా షేరింగ్, రాజ్యాంగం ప్రకారం వినియోగదారుల గోప్యతకు భంగం కలుగుతుందనే ఆందోళనల నేపథ్యంలో దీనిని ప్రస్తుతానికి నిలిపివేస్తున్నట్లు స్పష్టం చేసింది. అయితే, ఈ పాలసీని అంగీకరించే నిర్ణయాన్ని వినియోగదారులకే వదిలేస్తున్నామని, వారిపై ఒత్తిడి చేయబోమని పేర్కొంది. ఈ మేరకు వాట్సాప్ తరఫున సీనియర్ న్యాయవాది హరీశ్ సాల్వే తెలియజేశారు.

‘ప్రభుత్వం ఈ ప్రైవసీ పాలసీని నిలిపివేయాలని చెప్పింది. డేటా ప్రొటెక్షన్ బిల్లు వచ్చేవరకు మేం దీన్ని అమలు చేయమని చెప్పాం.. తాత్కాలికంగా నిలిపివేస్తూ స్వచ్ఛందంగా అంగీకరించాం.. ఒకవేళ బిల్లు దీన్ని అనుమతిస్తే.. అందుకు తగినట్టు వ్యవహరిస్తాం.. రాబోయే వారాల్లో వాట్సాప్ ఎలా పనిచేస్తుందో దాని కార్యాచరణను మేం పరిమితం చేయబోం’ అని న్యాయవాది హరీశ్ సాల్వే కోర్టుకు వెల్లడించారు. అలాగే వాట్సాప్ పాలసీ ఇన్ఫర్మేషన్ టెక్నాలజీ నిబంధనలకు విరుద్ధంగా ఉందని కేంద్రం భావిస్తోందని వివరించారు.

వాస్తవానికి వాట్సాప్ కొత్త పాలసీ ఫిబ్రవరిలోనే అమల్లోకి రావాల్సింది. అయితే వివిధ వర్గాల నుంచి వ్యతిరేకత వ్యక్తకావడంతో మే 15 వరకూ వాయిదా వేసింది. అయితే ఈ విధానాన్ని వెనక్కి తీసుకోవాలంటూ కేంద్రం రాసిన లేఖపై కొద్ది రోజుల తర్వాత వాట్సాప్ స్పందించింది. వినియోగదారుల భద్రతకే తొలి ప్రాధాన్యమని స్పష్టం చేసింది. కాగా, కేంద్రం తీసుకువచ్చిన కొత్త ఐటీ నిబంధనలు కేంద్రం, వాట్సాప్ మధ్య వివాదానికి దారితీశాయి.

భారత ప్రభుత్వం విధించిన నిబంధనలు పూర్తిగా అమలు చేస్తే వినియోగదారుల గోప్యతకు భంగం కలుగుతుందని, అందుకు తాము సిద్ధంగాలేమని పేర్కొంటూ వాట్సాప్ కోర్టును ఆశ్రయించింది. ఇది ప్రభుత్వ ఆగ్రహానికి కారణమైంది. ప్రైవసీ పాలసీ గురించి పూర్తి సమాచారం ఇవ్వాలంటూ కాంపిటీషన్ కమిషన్ ఆఫ్ ఇండియా (సీసీఐ) నోటీసులు జారీచేయగా… వాట్సాప్ దీనిని కోర్టులో సవాల్ చేసింది. అయితే, ఈ అంశంపై మధ్యంతర ఉత్తర్వులకు హైకోర్టు నిరాకరించింది.

భారత్‌తోపాటు ఐరోపాయేతర దేశాల్లో తమ ప్రైవసీ పాలసీలో వాట్సాప్ మార్పులు చేసింది. మీరు వాట్సాప్ ఉపయోగించాలి అనుకుంటే.. ఖచ్చితంగా కొత్త విధానానికి అనుమతి తెలపాల్సిందేనని పేర్కొంది. ఆండ్రాయిడ్, ఐవోఎస్ వినియోగదారులకు నోటిఫికేషన్ రూపంలో వాట్సాప్ ఈ విషయాన్ని తెలియజేసింది. ‘మీ గోప్యతను గౌరవించడమనేది మా రక్తంలో ఉంది.. వ్యక్తిగత గోప్యతా నిబంధనలను పరిగణలోకి తీసుకుంటూనే మీకు వీలైనంత మెరుగైన సేవలు అందించాలని మేం లక్ష్యంగా పెట్టుకున్నాం’’ గతేడాది జులై 20 న వాట్సాప్ విడుదల చేసిన పాత విధానాల్లో పేర్కొంది.

కానీ, జనవరి 4, 2021న విడుదల చేసిన కొత్త విధానాల్లో ‘‘వ్యక్తిగత గోప్యతను గౌరవించడం’’లాంటి పదాలు కనిపించ లేదు. ‘మేం అనుసరిస్తున్న విధానాలను మీకు వివరించేందుకు మా ప్రైవసీ పాలసీ సహకరిస్తుంది. మేం ఎలాంటి సమాచారాన్ని సేకరిస్తాం. దానితో ఏం చేస్తాం.. లాంటి అంశాలను ఇది తెలియజేస్తుంది’’అని కొత్త పాలసీలో పేర్కొన్నారు.

Leave a Reply

Your email address will not be published. Required fields are marked *

Next Post

మోటొరోలా కొత్త 5జీ ఫోన్ వచ్చేసింది.. రూ.20 వేలలోపే సూపర్ ఫీచర్లు!

Fri Jul 9 , 2021
మోటొరోలా కొత్త 5జీ స్మార్ట్ ఫోన్ లాంచ్ చేసింది. అదే మోటొరోలా వన్ 5జీ యూడబ్ల్యూ ఏస్. దీని ధరను అమెరికాలో 299.99 డాలర్లుగా(సుమారు రూ.22,400) నిర్ణయించారు.