మల్లా రెడ్డికి బిగ్‌ షాక్.. చిట్టా విప్పిన రేవంత్ రెడ్డి, చెంచాలతో వద్దంటూ చాలెంజ్

రాజీనామా చేసి రావాలని మంత్రి మల్లా రెడ్డి చేసిన సవాల్‌కి రెండు రోజులుగా స్పందించని టీపీసీసీ చీఫ్ రేవంత్ రెడ్డి దిమ్మతిరిగే షాకిచ్చారు. మల్లా రెడ్డి కాలేజీలు, ఆస్పత్రులు.. వాటి భూముల లెక్కలతో చిట్టా విప్పి మరీ మైండ్‌ బ్లాంక్ అయ్యేలా రిప్లై ఇచ్చారు.

ప్రధానాంశాలు:మల్లా రెడ్డి అక్రమాల చిట్టా ఇదేలెక్కలతో వచ్చిన రేవంత్ రెడ్డిఏం చేస్తావని కేసీఆర్‌కి సూటి ప్రశ్నటీపీసీసీ చీఫ్ రేవంత్ రెడ్డి వర్సెస్ మంత్రి మల్లా రెడ్డి ఎపిసోడ్ మరింత హీట్ రాజేస్తోంది. మూడుచింతలపల్లిలో రేవంత్ రెడ్డి చేపట్టిన దళిత, గిరిజన ఆత్మగౌరవ దీక్ష ముగింపు సభలో మంత్రి మల్లా రెడ్డిపై తీవ్ర ఆరోపణలు గుప్పించారు. భూములు కబ్జా చేసి భవంతులు కట్టారని.. తప్పుడు పత్రాలతో యూనివర్సిటీలు తెచ్చుకున్నాడని ఆరోపించారు. పదునైన వ్యాఖ్యలతో విరుచుకుపడడడంతో అదే స్థాయిలో మల్లా రెడ్డి కౌంటరిచ్చారు. దమ్ముంటే రా తేల్చుకుందా రేవంత్ రెడ్డి.. రాజీనామా చేసి పోటీ చేద్దామంటూ సవాల్ విసిరారు. ఎవడు గెలిస్తే వాడు హీరో.. ఓడినోడు జీరో అంటూ తొడగొడుతూ ఊగిపోయారు మల్లా రెడ్డి. సవాల్‌కి సిద్ధమేనా అంటూ ప్రశ్నలు గుప్పించారు.

అయితే మల్లా రెడ్డి సవాల్‌కి రెండు రోజులుగా స్పందించని రేవంత్ మంత్రికి ఊహించని షాకిచ్చారు. ఏకంగా ఆధారాలతో సహా మీడియా ముందుకు వచ్చారు. మంత్రి యూనివర్సిటీ భూములు ఎక్కడి నుంచి వచ్చాయ్.. సీఎంఆర్ హాస్పిట్సల్ భూమి ఎక్కడిదనే విషయాలను బయటపెట్టారు. 1965 నాటికి గుండ్లపోచంపల్లి సర్వే నంబర్ 650లో మొత్తం 22 ఎకరాల 8 గుంటల భూమి ఉందని రేవంత్ తెలిపారు. 2001 నాటికి కూడా అదే 22 ఎకరాల భూమి ఉందన్నారు. కానీ కేసీఆర్ తీసుకొచ్చిన ధరణి పోర్టల్‌లో మాత్రం 33 ఎకరాల 26 కుంటలకి పెరిగిందని రేవంత్ చెప్పారు. సర్వే నంబర్‌లో 22 ఎకారాలున్న భూమి అమాంతం 33 ఎకరాలకు ఎలా పెరిగిందని.. అదేమైనా కేసీఆర్ ముక్కా రోజూ కొంత పెరగడానికంటూ వరుస ప్రశ్నలతో విరుచుకుపడ్డారు.

ఆ సర్వే నంబర్ 650లోని 33 ఎకరాల్లో 16 ఎకరాలు మల్లా రెడ్డి బావమరిది, గుండ్లపోచంపల్లి మున్సిపల్ చైర్ పర్సన్ భర్త శ్రీనివాసరెడ్డి పేరు మీద ఉందని.. దాన్ని ఆయన మల్లా రెడ్డి ఎడ్యుకేషనల్ సొసైటీకి గిఫ్ట్ డీడ్‌ ఇచ్చారని చెప్పారు. బావమరిదికి ఆస్తులుంటే నాకేం సంబంధమని చెప్పిన మల్లా రెడ్డికి గిఫ్ట్ డీడ్‌ కింద ఎలా ఇచ్చారని రేవంత్ సూటిగా ప్రశ్నించారు. బావ కళ్లలో ఆనందం కోసం బావమరిది ఇచ్చిండా అంటూ ఎద్దేవా చేశారు. ఇక జవహర్ నగర్‌లోని సర్వే నంబర్ 488లో 5 ఎకరాల భూమి రిజిస్ట్రేషన్స్ అండ్ స్టాంప్స్ డిపార్ట్‌మెంట్ ప్రభుత్వ భూమిగా పేర్కొంటూ క్రయవిక్రయాలు నిషేధించిందని తెలిపారు. అధికారులు పెట్టిన బోర్డుల ఫొటోలను కూడా రిలీజ్ చేశారు రేవంత్.

ఇప్పుడదే భూమి రిజిస్ట్రేషన్లు జరిగి మల్లా రెడ్డి కోడలు షాలినీ రెడ్డి కొనుగోలు చేసినట్లు చూపుతున్నారని రేవంత్ చెప్పారు. అందులో సీఎంఆర్ హాస్పిటల్స్ కట్టి వ్యాపారం కూడా చేస్తున్నారని ఆయన అన్నారు. మల్లా రెడ్డి కొడుకు మహేందర్ రెడ్డి సతీమణి షాలినీ రెడ్డి అని.. జవహర్‌నగర్ వైస్‌ చైర్మన్ పేరుతో ఉన్న భూమి షాలినీ రెడ్డి పేరు మీదకు ఎలా వచ్చాయని ఆయన ప్రశ్నించారు. మున్సిపల్ ఎన్నికల్లో పదవులు ఇచ్చినందుకు లంచంగా ఆ భూమిని మింగేశారని రేవంత్ ఆరోపించారు. అసలు నిషేధిత భూమిగా అధికారులు పేర్కొన్న అదే భూమికి రిజిస్ట్రేషన్లు ఎలా జరిగాయని ఆయన ప్రశ్నించారు. ఇంజనీరింగ్ కాలేజీకి న్యాక్ గుర్తింపు కోసం దరఖాస్తు చేసుకుంటే తప్పుడు పత్రాలు సమర్పించారంటూ ఐదేళ్ల నిషేధం విధించిందని రేవంత్ చెప్పారు. మరి అలాంటి కళాశాలని యూనివర్సిటీగా అప్‌గ్రేడ్ చేసుకునేందుకు ఎలా అనుమతులు ఇచ్చారని సీఎం కేసీఆర్‌ని రేవంత్ నిలదీశారు.

మేడ్చల్ పరిధిలో 50 ఎకరాల వెంచర్ వేసిన వ్యాపారులను మామూళ్ల కోసం బెదిరించిన ఆడియో టేపులు బయటికి వచ్చాయని.. అలాగే మున్సిపల్ ఎన్నికల సమయంలో సీట్లు అమ్ముకున్నారని కూడా మంత్రి మల్లా రెడ్డిపై ఆరోపణలు వచ్చాయని రేవంత్ అన్నారు. తన మంత్రివర్గంలో ఎవరైనా అవినీతికి పాల్పడితే ఉపేక్షించేంది లేదని.. చివరికి తన కొడుకు, కూతురైనా ఊరుకునేది లేదని కేసీఆర్ అసెంబ్లీలో గొప్పగా చెప్పారని రేవంత్ గుర్తు చేశారు. అవినీతి ఆరోపణలు వచ్చాయని ఉప ముఖ్యమంత్రి రాజయ్యని పీకేసి.. భూ కబ్జా ఆరోపణలు వచ్చాయని ఈటల రాజేందర్‌ను బయటికి పంపించిన కేసీఆర్‌కి మల్లా రెడ్డి అవినీతి ఎందుకు కనపడడం లేదని రేవంత్ ప్రశ్నించారు. దొంగగా ఉన్న మల్లా రెడ్డిని గజదొంగని చేసి పక్కన పెట్టుకున్నాడంటూ తీవ్ర విమర్శలు చేశారు.

ఫీజు రీయింబర్స్ మెంట్ పథకం కింద వందల కోట్లు కొల్లగొట్టినట్లు విజిలెన్స్ ఎన్‌ఫోర్స్‌మెంట్ ఇచ్చిన నివేదికను బయటపెట్టాలని రేవంత్ డిమాండ్ చేశారు. పచ్చిదొంగలను కేసీఆర్ ప్రోతసహిస్తున్నారని ఆయన మండిపడ్డారు. సమస్యలను పక్కదారి పట్టించేందుకు చిల్లర వేషాలు వేస్తున్నారని.. తిట్ల పోటీ పెట్టుకుందామంటే రెడీగా ఉన్నానన్నారు రేవంత్. ప్రగతి భవన్‌ అయినా ఫాం హౌస్‌కి రమ్మన్నా వస్తానని రేవంత్ హెచ్చరించారు. రాజీనామా చేసి ఎన్నికలకు వెళ్దామన్న మంత్రి మల్లా రెడ్డి సవాల్‌కి ఘాటు సమాధానమిచ్చారు రేవంత్. 2019లో తాను పోటీ చేసింది మల్లా రెడ్డి పైనేనని.. మధ్యలో చెంచాలతో కాదు.. కేసీఆర్‌నే రమ్మని చాలెంజ్ చేశారు. ప్రభుత్వాన్ని రద్దు చేసి రావాలని.. లేకుంటే గజ్వేల్‌లో రాజీనామా చేసి రావాలని సవాల్ విసిరారు.

Also Read: చెట్టు నుంచి రాలిన కుళ్లిన శవం.. షాకింగ్
Read Also: టీఆర్‌ఎస్‌తో కలిసి బీజేపీ హైడ్రామా.. ఈటల ఓటమికి వందల కోట్లు, బాంబు పేల్చిన మాజీ ఐపీఎస్

Leave a Reply

Your email address will not be published. Required fields are marked *

Next Post

మోటొరోలా బడ్జెట్ 5జీ ఫోన్ సేల్ మొదలైంది.. 108MP కెమెరా, ఓఎల్ఈడీ స్క్రీన్ కూడా!

Fri Aug 27 , 2021
మోటొరోలా ఎడ్జ్ 20 ఫ్యూజన్ స్మార్ట్ ఫోన్ ఇటీవలే మనదేశంలో లాంచ్ అయిన సంగతి తెలిసిందే. దీనికి సంబంధించిన సేల్ మనదేశంలో ప్రారంభం అయింది. ఈ ఫోన్ ధర రూ.21,499 నుంచి ప్రారంభం కానుంది.