విక్రమాదిత్యుడి సీటులాంటిదే జడ్జి సీటు.. వీడ్కోలు సభలో జస్టిస్ హిమా కోహ్లి వ్యాఖ్యలు

సుప్రీంకోర్టు న్యాయమూర్తిగా పదోన్నతి పొందిన జస్టిస్ హిమా కోహ్లికి.. హైకోర్టు న్యాయమూర్తులు, హైకోర్టు బార్‌ అసోసియేషన్‌ ఆధ్వర్యంలో ఘనంగా వీడ్కోలు పలికారు.

ప్రధానాంశాలు:జస్టిస్ హిమా కోహ్లీకి సుప్రీం న్యాయమూర్తిగా పదోన్నతి.తెలంగాణ హైకోర్టు సీజేగా ఏడు నెలల సేవలు.హైదరాబాద్ నగరంపై ప్రశంసలు కురిపించిన జస్టిస్.సుప్రీంకోర్టు న్యాయమూర్తిగా నియమితులైన తెలంగాణ హైకోర్టు ప్రధాన న్యాయమూర్తి జస్టిస్ హిమా కోహ్లీకి ఘనంగా వీడ్కోలు పలికారు. ఈ సందర్భంగా జస్టిస్ హిమా కోహ్లి మాట్లాడుతూ.. హైదరాబాద్‌ వచ్చి అతి తక్కువ కాలమే అయినా మధురమైన జ్ఞాపకాలను వెంట తీసుకెళుతున్నానని వ్యాఖ్యానించారు. ఆధునిక నగరమైనా గొప్ప సంస్కృతి, సంప్రదాయాలతో నిండి, ఆప్యాయతానురాగాలు పంచే వ్యక్తులు ఇక్కడ ఎందరో ఉన్నారని ఆమె కొనియాడారు. 1980లో స్వతంత్రంగా న్యాయవాద వృత్తి ప్రారంభించానని చెప్పారు.

‘ఢిల్లీ లాంటి నగరంలో మహిళగా న్యాయవాద వృత్తిలో రాణించడం సవాల్.. అయినా సవాళ్లు లేకుండా ఏ విజయమూ దక్కదు..22 ఏళ్ల న్యాయవాద వృత్తిలో, 15 ఏళ్లు న్యాయమూర్తిగా ఎన్నో సవాళ్లు ఎదుర్కొన్నాను.. ఏ వృత్తిలో అయినా రాణించడానికి కృషి, అంకితభావం, నిజాయితీ ముఖ్యం.. నా తల్లిదండ్రులు, సోదరి మద్దతు మరువలేనిది’ అన్నారు. విచారణ సమయంలో న్యాయవాదులు కీలకమైన విషయాలను చెప్పి సహకరించాలని జస్టిస్ కోహ్లి సూచించారు.

బెంచ్‌ దిగిన తర్వాత న్యాయమూర్తులకు అసలైన పని ఉంటుందని, ఆ రోజు ఉత్తర్వులు, రిజర్వు చేసిన తీర్పులతో రోజూ యుద్ధమే జరుగుతుందన్నారు. ఓ రకంగా చెప్పాలంటే జడ్జి సీటు అంటే విక్రమాదిత్యుడి సీటులాంటిదే.. అందులో కష్టాలున్నా, పనిలో స్వచ్ఛత, కార్యశీలత ఉంటాయని జస్టిస్‌ కోహ్లి అన్నారు. తెలంగాణ హైకోర్టు ప్రధాన న్యాయమూర్తిగా నియమితులవుతున్నట్లు తెలిసిన తర్వాత స్నేహితులు ఈ హైకోర్టు ఫొటోలను పంపారని, ఈ భవనం తన మనసులో చెరగని ముద్ర వేసిందని ఆమె పేర్కొన్నారు.

వందేళ్ల ఈ భవనంలో చీఫ్ జస్టిస్‌గా సేవలందించడం ఎవరికైనా గర్వకారణమే అని వ్యాఖ్యానించారు. మహిళా ప్రధాన న్యాయమూర్తి అని కాకుండా సహచర న్యాయమూర్తులు సంపూర్ణ మద్దతిచ్చారని, అలాగే బార్‌ కూడా సహకరించిందని అందరికీ ఆమె కృతజ్ఞతలు తెలిపారు. హైకోర్టులో న్యాయమూర్తుల కొరత ఉందని, 2.32 లక్షల పెండింగ్‌ కేసులున్నాయని తెలిపారు. ఈ ఏడు నెలల్లో ఆరుగురు జిల్లా న్యాయమూర్తులు, బార్‌ నుంచి ఏడుగురిని హైకోర్టు న్యాయమూర్తుల నియామకానికి సిఫారసు చేశానన్నారు.

మరో ఏడుగురి నియామకాలు త్వరలో జరగనున్నట్టు వెల్లడించారు. త్వరలో న్యాయమూర్తుల సంఖ్య 32కు చేరుతుందని ఆమె ఆశాభావం వ్యక్తం చేశారు. సెప్టెంబరు 1న వీడ్కోలు ఉంటుందని భావించానని, అయితే, సుప్రీంకోర్టులో సేవచేసే అవకాశం కల్పించిన జస్టిస్‌ ఎన్వీ రమణ, కొలీజియానికి జస్టిస్ హిమా కోహ్లి కృతజ్ఞతలు తెలిపారు.

Leave a Reply

Your email address will not be published. Required fields are marked *

Next Post

Rishabh Pant స్టాన్స్‌ వివాదం.. ఫీల్డ్ అంపైర్‌పై గవాస్కర్ మండిపాటు

Sat Aug 28 , 2021
లీడ్స్ టెస్టులో ఇంగ్లాండ్‌కి చెందిన ఫీల్డ్ అంపైర్లు.. రిషబ్ పంత్‌ని ఉద్దేశ‌పూర్వకంగా స్టాన్స్‌ని మార్చుకునేలా చేశారా..? అంటే అవుననే సమాధానాలు వినిపిస్తున్నాయి. అలాంటి రూల్ లేకపోయినా..