ఆ శాఖల్లో అన్నీ భర్తీ చేయాల్సిందే.. TS కేబినెట్ నిర్ణయాలు, సబ్ కమిటీ ఏర్పాటు

TS Cabinet: గత సంవత్సర కాలంలో వ్యవసాయ రంగంలో జరిగిన పురోగతి, ధాన్యం దిగుబడి, సాగు విస్తీర్ణం పెంపు, తదితర విషయాలను వ్యవసాయ శాఖ మంత్రి నిరంజన్ రెడ్డి, ఆ శాఖ అధికారులు కేబినెట్‌కు సమగ్రంగా వివరించారు.

ముఖ్యమంత్రి కేసీఆర్ అధ్యక్షత‌న వరుసగా రెండో రోజు బుధ‌వారం కూడా ప్రగ‌తి భ‌వ‌న్‌లో కేబినెట్ స‌మావేశం జరిగింది. ఇందులో పలు అంశాలపై చర్చించారు. ఈ సందర్భంగా గత సంవత్సర కాలంలో వ్యవసాయ రంగంలో జరిగిన పురోగతి, ధాన్యం దిగుబడి, సాగు విస్తీర్ణం పెంపు, తదితర విషయాలను వ్యవసాయ శాఖ మంత్రి నిరంజన్ రెడ్డి, ఆ శాఖ అధికారులు కేబినెట్‌కు సమగ్రంగా వివరించారు. ఏడేళ్ల కాలంలో తెలంగాణ వ్యవసాయ ప్రస్థానం, సాధించిన విజయాలను సీఎం కేసీఆర్ సమావేశంలో ప్రస్తావించారు.

నాణ్యమైన ఉచిత విద్యుత్, సాగునీటి ప్రాజెక్టుల నిర్మాణంతో వ్యవసాయానికి అనువుగా ఉన్న భూములన్నింటినీ రైతులు సాగు చేస్తున్నారని వివరించారు. రాష్ట్రంలో సాగువిస్తీర్ణం పెద్దఎత్తున పెరిగిందన్నారు. రైతుబంధు సహా సకాలంలో ఎరువులు, విత్తనాలు, తదితర రైతు సంక్షేమ కార్యక్రమాల ఫలితంగా గతేడాది రాష్ట్రంలో రికార్డు స్థాయిలో మూడు కోట్ల టన్నుల ధాన్యం ఉత్పత్తి జరిగిందన్నారు. రైతులు మరింత ఉత్సాహంతో వరి పండించే పరిస్థితులు రాష్ట్రంలో నెలకొన్నాయని.. వచ్చే ఏడాది ధాన్యం ఉత్పత్తి మరింత పెరిగే అవకాశాలున్నాయని పేర్కొన్నారు. అందుకు అనుగుణంగా ధాన్యం నిల్వ, మార్కెటింగ్‌పై పూర్తిస్థాయిలో దృష్టి సారించాలని అధికారులను ఆదేశించారు.

రెండు శాఖల్లో ఖాళీలు ఉండకూడదు..
సందర్భానుసారంగా అవసరాలను గుర్తించి అధికారులు, నిపుణులు సంయుక్తంగా రైతులకు శిక్షణ కార్యక్రమాలు నిర్వహించాలని సీఎం ఆదేశించారు. పౌరసరఫరాల శాఖ సహా వ్యవసాయశాఖలో ఉన్న ఖాళీలను వెంటనే భర్తీ చేయాలని అన్నారు. పండిన ధాన్యం పండినట్లే ఫుడ్ ప్రాసెసింగ్‌లో భాగంగా మిల్లింగ్ చేసి ఎక్కడ డిమాండ్ ఉంటే అక్కడికి సరఫరా చేయాలని ఆదేశించారు. ఈ దిశగా అన్ని చర్యలు తీసుకోవాలని సంబంధిత శాఖల అధికారులను ఆదేశించారు. అవసరమైతే ఆయా రంగాల్లో నిపుణుల సలహాలు, సూచనలు తీసుకోవాలన్నారు. రాబోయే రోజుల్లో రాష్ట్రంలో ధాన్యం ఉత్పత్తి పెరగనున్న నేపథ్యంలో ధాన్యం నిల్వ, మిల్లింగ్, మార్కెటింగ్ సహా కొత్త పరిశ్రమల ఏర్పాటుకు తీసుకోవాల్సిన చర్యలపై వ్యవసాయ శాఖ మంత్రి నిరంజన్ రెడ్డి ఆధ్వర్యంలో మంత్రివర్గ ఉపసంఘాన్ని ఏర్పాటు చేశారు. మంత్రులు గంగుల కమలాకర్, హరీశ్ రావు, కేటీఆర్, ఇంద్రకరణ్ రెడ్డి, పువ్వాడ అజయ్ కుమార్, సబితా ఇంద్రారెడ్డి, ప్రశాంత్ రెడ్డి, జగదీశ్ రెడ్డి ఈ కమిటీలో సభ్యులుగా ఉండనున్నారు.

రాష్ట్రంలో ఆయిల్ పామ్‌ పంట సాగు ప్రోత్సహించాలని రాష్ట్ర మంత్రివర్గం నిర్ణయించింది. రానున్న 2022-23 సంవత్సరానికి 20 లక్షల ఎకరాల్లో ఆయిల్ పామ్ సాగు చేపట్టే దిశగా రైతులను చైతన్యపరిచి ప్రోత్సహించాలని మంత్రివర్గం నిర్ణయం తీసుకుంది. ఆయిల్ పామ్ సాగు చేసే రైతులకు ఎకరాకు.. మొదటి ఏడాది రూ.26 వేలు, తరువాతి రెండేళ్లు ఏటా రూ.5 వేల చొప్పున పంట పెట్టుబడి ప్రోత్సాహకం కింద రాయితీగా అందించాలని నిర్ణయం తీసుకుంది. దీనిలో భాగంగా అటవీ శాఖ, అటవీ అభివృద్ధి సంస్థతో పాటు పంచాయతీరాజ్, గ్రామీణాభివృద్ధి శాఖలు సంయుక్తంగా ఆయిల్ పామ్ మొక్కల నర్సరీలు పెంచాలని కేబినెట్ సూచించింది.

ఈ పంట సాగు విధానం గురించి మరింతగా తెలుసుకునేందుకు మంత్రులు, ప్రజాప్రతినిధులు, అధికారులతో కూడిన అధ్యయన బృందం.. కోస్టారికా, మలేసియా, థాయ్‌లాండ్, ఇండోనేషియా తదితర దేశాల్లో పర్యటించాలని మంత్రివర్గం ఆదేశించింది. టీ ఐడియా, తెలంగాణ స్పెషల్ ఫుడ్ ప్రాసెసింగ్ జోన్ల నిబంధనల ప్రకారం ఆయిల్ పామ్ ప్రాసెసింగ్ యూనిట్లకు ప్రోత్సాహకాలు అందించాలని అధికారులను మంత్రివర్గం ఆదేశించింది.

Leave a Reply

Your email address will not be published. Required fields are marked *

Next Post

కాఫీ ఆరోగ్యానికి మంచిదేనా? ప్రయోజనాలేమిటీ?

Wed Jul 14 , 2021
కాఫీ తాగడం మంచిదా, కాదా? గుండె సమస్యలు ఉంటే కాఫీ తాగొచ్చా.. ఇలా ఎన్నో సందేహాలు, అపోహలు ఉన్నాయి. వాటి గురించి తెలుసుకోండి.