వెజిటేరియన్లకు కరోనా ముప్పు తక్కువే.. సీఎస్ఐఆర్ సెరో సర్వేలో ఆసక్తికర ఫలితాలు!

CSIR Sero-survey మాంసాహారుల కంటే వెజిటేరియన్లకు కరోనా ముప్పు తక్కువగానే ఉందని, దీనికి వారి ఆహారపు అలవాట్లే కారణమని తాజాగా ఓ అధ్యయనంలో తేలింది.

ప్రధానాంశాలు:దేశవ్యాప్తంగా 10వేల మందిపై సెరో సర్వే. అధ్యయనంలో సీఎస్ఐఆర్ సిబ్బంది.పొగరాయళ్లకు కోవిడ్ ముప్పు తక్కువేనని వెల్లడి. శాకాహారులు, ధూమపానం చేసేవారికి, ‘ఓ’ రకం బ్లడ్‌ గ్రూప్‌ ఉన్నవారికి కరోనా వైరస్‌ బారినపడే అవకాశాలు తక్కువేనని తాజా సర్వేలో వెల్లడయ్యింది. కోవిడ్ యాంటీబాడీల స్థాయిను అంచనా వేసేందుకు సీఎస్‌ఐఆర్‌ చేపట్టిన అధ్యయనంలో ఆసక్తికర విషయాలు వెలుగులోకి వచ్చాయి. కోవిడ్‌ను ఎదుర్కొనే యాంటీబాడీలు, వైరస్‌ను ఎదుర్కోవడంలో అవి ప్రతిస్పందించే సామర్థ్యం అంచనా వేయడానికి కౌన్సిల్‌ ఆఫ్‌ సైంటిఫిక్‌ అండ్‌ ఇండస్ట్రియల్‌ రిసెర్చ్‌(సీఎస్‌ఐఆర్‌) దేశవ్యాప్తంగా సెరోసర్వే నిర్వహించింది.

దేశవ్యాప్తంగా 140 మంది వైద్య నిపుణులు, శాస్త్రవేత్తల బృందం ఆధ్వర్యంలో ఈ సర్వే చేపట్టింది. ఇందుకు దేశంలోని 40 సీఎస్‌ఐఆర్‌ ల్యాబొరేటీల సిబ్బంది, వారి కుటుంబసభ్యులు మొత్తం 10,427 మంది సమాచారాన్ని విశ్లేషించారు. శాకాహారుల్లో వైరస్‌ వ్యాప్తి తక్కువగానే ఉన్నట్లు తాజా సర్వే గుర్తించింది. దీనికి గల కొన్ని కారణాలను సర్వే విశ్లేషించింది. శాకాహారులు తీసుకునే ఆహారంలో అధిక మొత్తంలో ఉండే ఫైబర్‌ కరోనా వైరస్‌ను ఎదుర్కోవడంలో కీలక పాత్ర పోషిస్తున్నట్లు తెలిపింది.

ఇక ‘O’ బ్లడ్‌ గ్రూప్‌నకు చెందిన వ్యక్తులు కూడా వైరస్‌ బారినపడే అవకాశాలు తక్కువగానే ఉన్నాయని సర్వే పేర్కొంది. B, AB రకం వారికి వైరస్‌ సోకే ముప్పు కాస్త ఎక్కువగానే ఉన్నట్లు తెలిపింది. తాజా అధ్యయనం పరిశీలన(పీర్‌-రివ్యూ) కూడా పూర్తయ్యిందని కో-ఆథర్ శంతను సేన్‌ గుప్తా పేర్కొన్నారు

కోవిడ్ శ్వాసకోశ వ్యవస్థపై దాడిచేసే వ్యాధి అయినప్పటికీ, శ్లేష్మ ఉత్పత్తిని పెంచడంలో దాని పాత్ర కారణంగా ధూమపానం రక్షణలో మొదటి వరుసగా పనిచేస్తుందని సర్వే పేర్కొంది. అయితే, కరోనా సంక్రమణపై ధూమపానం, నికోటిన్ ప్రభావాన్ని అర్థం చేసుకోవడానికి మరింత లోతైన అధ్యయనం అవసరం ఉందని వ్యాఖ్యానించింది.

‘‘ధూమపానం ఆరోగ్యానికి తీవ్ర హానికరం.. పలు వ్యాధులకు దారితీస్తుంది.. ముఖ్యంగా ఈ ప్రతిపాదన శాస్త్రీయంగా నిరూపితం కానందున ఈ పరిశీలనను పరిగణనలోకి తీసుకోరాదు’’ అని పరిశోధన పత్రం నొక్కి చెప్పింది.

గతంలో ఫ్రాన్స్, ఇటలీ, చైనా, అమెరికా అధ్యయనాలు కూడా ధూమపానం చేసేవారికి కోవిడ్ ముప్పు తక్కువని వెల్లడించాయి. అమెరికా సెంటర్స్ ఫర్ డిసీజ్ కంట్రోల్ అండ్ ప్రివెన్షన్ (సీడీసీ) 7 వేల మందికిపైగా అధ్యయనం చేపట్టింది. అయితే, అమెరికాలోని మొత్తం 14 శాతం ధూమపానం చేసేవారిలో 1.3 శాతం మంది ఈ అధ్యయంలో పాల్గొనడం గమనార్హం.

Leave a Reply

Your email address will not be published. Required fields are marked *

Next Post

Oscar 2021.. ‘టెనెట్’ అలా ‘సోల్’ ఇలా.. హిస్టరీలో ఫస్ట్ టైం!

Mon Apr 26 , 2021
ప్రపంచ సినీ అభిమానులు ఎదురుచూసే అవార్డుల కార్యక్రమం గురించి అందరికీ తెలిసిందే. ప్రపంచంలోని ప్రతీ ఒక్కరూ ఆస్కార్ అవార్డుల గురించి మాట్లాడుకుంటూనే ఉంటారు. 93వ ఆస్కార్ వేడుకలు ఘనంగా ప్రారంభమయ్యాయి. ఇప్పటికే ఉత్తమ చిత్రం, నటి, సహాయ నటి, సహాయ నటుడు వంటి కేటగిరీల్లో విజేతలను ప్రకటించారు.