Punjab CM కెప్టెన్ అమరీందర్ రాజీనామా.. భవిష్యత్తు కార్యాచరణపై కీలక ప్రకటన!

పంజాబ్‌ రాజకీయాల్లో కీలక పరిణామం చోటుచేసుకుంది. రాజకీయ కురువృద్ధుడు, కెప్టెన్‌ అమరీందర్‌ సింగ్‌ ముఖ్యమంత్రి పదవికి శనివారం రాజీనామా చేశారు.

ప్రధానాంశాలు:ఆరు మాసాలుగా కొనసాగుతున్న ఇంటి పోరు.అమరీందర్‌కు పక్కలో బల్లెంలా రెబల్ నేత సిద్ధూ.పీసీపీ పగ్గాలు అప్పగించినా చల్లారని అసమ్మతి. పంజాబ్‌ కాంగ్రెస్ ప్రభుత్వంలో ఏర్పడిన రాజకీయ సంక్షోభం శనివారం అనూహ్య మలుపు తిరిగింది. పంజాబ్‌ పీసీసీ అధ్యక్షుడు నవజోత్ సింగ్ సిద్ధూ, ముఖ్యమంత్రి కెప్టెన్ అమరీందర్ సింగ్ మధ్య విభేదాలు తారాస్థాయికి చేరుకున్నాయి. ఈ నేపథ్యంలో ముఖ్యమంత్రి కెప్టెన్ అమరీందర్‌ సింగ్‌ రాజీనామా చేశారు. తన సతీమణితో కలిసి రాజ్‌భవన్‌కు చేరుకున్న కెప్టెన్‌.. గవర్నర్‌ భన్వరిలాల్‌ పురోహిత్‌కు తన రాజీనామా లేఖను సమర్పించారు. కాంగ్రెస్‌ అధిష్ఠానం ఒత్తిడి మేరకు సీఎం పదవికి ఆయన రాజీనామా చేసినట్లు తెలుస్తోంది.

అయితే, తాజా పరిణామాలతో విసిగిపోయానని.. అవమానాల మధ్య పదవిలో కొనసాగలేనని అంతకు ముందు అమరీందర్‌ సింగ్‌ సోనియాకు స్పష్టం చేశారని ప్రచారం జరిగింది. కొద్ది గంటల్లోనే ఆయన ముఖ్యమంత్రి పదవికి రాజీనామా చేయడం గమనార్హం. రాజీనామా సమర్పించిన అనంతరం రాజ్‌భవన్‌ బయట కెప్టెన్‌ అమరీందర్ సింగ్ మీడియాతో మాట్లాడుతూ.. దీన్ని అవమానంగా భావిస్తున్నానని అన్నారు. రాజీనామా చేయాలని ఈ ఉదయమే నిర్ణయానికి వచ్చానని, ఆ విషయాన్ని కాంగ్రెస్‌ అధ్యక్షురాలు సోనియాకు చెప్పానని తెలిపారు.

తన మద్దతుదారులతో చర్చించి భవిష్యత్‌ కార్యాచరణపై నిర్ణయం తీసుకుంటానని వ్యాఖ్యానించారు. మరోవైపు, పంజాబ్‌ కాంగ్రెస్‌ శాసనసభాపక్ష సమావేశం కాసేపట్లో జరగనుంది. ఈ సమావేశంలో అమరీందర్‌ వారసుడిని ఎన్నుకోనున్నారు. కాంగ్రెస్ వ్యవహారాల పంజాబ్ ఇంఛార్జ్ హరీశ్ రావత్ శాసనసభాపక్ష సమావేశం ఏర్పాటుచేసినట్టు వెల్లడించారు.

‘తక్షణమే కాంగ్రెస్ శాసనసభాపక్ష సమావేశం ఏర్పాటుచేయాలని పెద్ద సంఖ్యలో ఎమ్మెల్యేలు ఏఐసీసీని కోరుతూ విజ్ఞ‌ాపన పత్రం అందజేశారు.. దీంతో సమావేశం నిర్వహించాలని అధిష్ఠానం నిర్ణయించింది.. సెప్టెంబరు 18 సాయంత్రం 5 గంటలకు పంజాబ్ పీసీసీ కార్యాలయంలో ఈ భేటీ నిర్వహించనున్నాం’ అని శుక్రవారం రాత్రి ఆయన తెలిపారు. సమావేశానికి ఏర్పాట్లు చేయాలని పీపీసీసీ కోరిన రావత్.. కాంగ్రెస్ ఎమ్మెల్యేలంతా తప్పనసరిగా హాజరుకావాలని సూచించారు. పంజాబ్‌లో వచ్చే ఏడాది అసెంబ్లీ ఎన్నికలు జరగనుండగా.. అసమ్మతి కాంగ్రెస్‌కు తలనొప్పిగా పరిణమించింది.

Leave a Reply

Your email address will not be published. Required fields are marked *

Next Post

ఈ రెండు తింటే ఎక్కువరోజులు బతుకుతారట..

Sat Sep 18 , 2021
కొన్ని ఆహార పదార్థాలు ఆరోగ్యాన్నిస్తాయి. వీటిని తీసుకోవడం వల్ల ఆరోగ్యంగా ఉంటామని చెబుతారు. మరికొన్ని తినడం వల్ల జీవిత కాలం పెరుగుతుందని కూడా పరిశోధనలు చెబుతున్నాయి. అవేంటంటే..