కేసీఆర్, జగన్‌కు కేంద్రం షాక్: కృష్ణా, గోదావరి ప్రాజెక్టులపై పెత్తనం బోర్డుల పరిధిలోకి!

AP Telangana Water Disputes కృష్ణా నదీ జలాల విషయంలో ఏపీ, తెలంగాణ మధ్య వివాదాలు తారాస్థాయికి చేరుకున్న నేపథ్యంలో కేంద్రం బోర్డుల పరిధిలో కీలక నోటిఫికేషన్ విడుదల చేసింది.

ప్రధానాంశాలు:తెలుగు రాష్ట్రాల మధ్య తీవ్రస్థాయికి జల వివాదం.బోర్డులను పరిధిని నిర్ణయిస్తూ కేంద్రం నోటిఫికేషన్.ఉమ్మడి ప్రాజెక్ట్‌ల వద్ద కేంద్ర బలగాలతో పహారా. తెలుగు రాష్ట్రాల మధ్య కొసాగుతున్న జల పంచాయతీకి కేంద్రం ముగింపు పలికే ప్రయత్నాలు ప్రారంభించింది. ఆంధ్రప్రదేశ్, తెలంగాణల్లోని ప్రాజెక్టులను బోర్డుల పరిధిలోకి తీసుకొస్తూ కేంద్ర జలశక్తి శాఖ గురువారం రాత్రి నోటిఫికేషన్ జారీచేసింది. దీంతో తెలుగు రాష్ట్రాల్లోని ప్రాజెక్టులన్నీ కృష్ణా, గోదావరి బోర్డుల ఆధీనంలోకి వెళ్లనున్నాయి. శ్రీశైలం, నాగార్జునసాగర్‌ సహా అన్నింటి నిర్వహణను బోర్డులకే అప్పగించారు. ఈ మేరకు బోర్డుల పరిధి, నిర్వహణ మార్గదర్శకాలను గెజిట్‌ నోటిఫికేషన్‌‌లో పేర్కొన్నారు.

అక్టోబరు 14 నుంచి ఇది అమల్లోకి రానుండగా.. ఒక్కో రాష్ట్రం ఒక్కో బోర్డుకు రూ. 200 కోట్ల చొప్పున 60 రోజుల్లో సీడ్‌ మనీ కింద డిపాజిట్‌ చేయాలి. నిర్వహణ ఖర్చులను అడిగిన 15 రోజుల్లోపు చెల్లించాల్సి ఉంటుంది. నోటిఫికేషన్ అమల్లోకి వచ్చిన తర్వాత అనుమతుల్లేని ప్రాజెక్టులకు ఆరు నెలలల్లోపు అనుమతులు తెచ్చుకోవాలి. ఒకవేళ అనుమతులు పొందడంలో విఫలమైతే ప్రాజెక్టులు పూర్తయినా వాటిని నిలిపివేయాల్సి ఉంటుంది.

కృష్ణా నదిపై ఉన్న 36, గోదావరిపై ఉన్న 71 ప్రాజెక్టులను రెండు బోర్డుల పరిధుల్లోకి తీసుకొచ్చింది. ఏపీ, తెలంగాణ మధ్య జల వివాదం తారాస్థాయికి చేరిన నేపథ్యంలో కేంద్రం తాజా నిర్ణయాలకు ప్రాధాన్యం ఏర్పడింది. ఆంధ్రప్రదేశ్‌ పునర్విభజన చట్టం మేరకు 2014లో కృష్ణా, గోదావరి బోర్డులను ఏర్పాటు చేశారు. వీటి పరిధిని కేంద్రం నోటిఫై చేయాల్సి ఉండగా.. పలు దఫాలు చర్చలు జరిగాయి. కేంద్రానికి బోర్డులు ముసాయిదాలను పంపించాయి. అయితే ప్రాజెక్టులవారీగా కేటాయింపులు లేకుండా పరిధిని ఎలా నిర్ణయిస్తారని తెలంగాణ లేవనెత్తింది.

బ్రిజేష్‌కుమార్‌ ట్రైబ్యునల్‌ తీర్పు తర్వాతే నిర్ణయించాలని కోరగా, బచావత్‌ ట్రైబ్యునల్‌ ప్రకారం 811 టీఎంసీల వినియోగాన్ని పరిగణనలోకి తీసుకోవాలని ఆంధ్రప్రదేశ్‌ కోరింది. దీనిపై చివరిసారిగా గతేడాది అక్టోబరులో కేంద్ర జల్‌శక్తి మంత్రి ఛైర్మన్‌గా, ఇద్దరు ముఖ్యమంత్రులు సభ్యులుగా ఉన్న అపెక్స్‌ కౌన్సిల్‌లో చర్చ జరిగింది. సీఎంల అభిప్రాయాల తర్వాత, బోర్డుల పరిధులపై తామే నిర్ణయం తీసుకుంటామని కేంద్రమంత్రి ప్రకటించారు. ఆ మేరకు తాజా నోటిఫికేషన్‌ విడుదలైంది.

బోర్డు ఛైర్మన్‌, సభ్య కార్యదర్శి, చీఫ్‌ ఇంజినీర్లుగా తెలంగాణ, ఆంధ్రప్రదేశ్‌‌కు సంబంధించిన వారు ఉండకూడదని తాజా నోటిఫికేషన్‌లో పేర్కొన్నారు. అంటే ఏపీ, తెలంగాణ కాకుండా ఇతర రాష్ట్రాలకు చెందిన చీఫ్ ఇంజినీర్లు సభ్యులుగా ఉంటారు. శ్రీశైలం, నాగార్జునసాగర్‌కు సంబంధించిన నిర్వహణ విధివిధానాలను రెండు రాష్ట్ర ప్రభుత్వాలు, బోర్డు సంయుక్తంగా తయారు చేయాల్సి ఉంది. నిర్వహణకు సంబంధించిన కేంద్ర ప్రభుత్వానికి ఉండే అధికారాలను బోర్డులు వినియోగించుకోవాలని పేర్కొన్నారు.

బోర్డుల నిర్వహణ వ్యయాన్ని రెండు రాష్ట్రాలూ భరించాలి. ఉమ్మడి ప్రాజెక్టులు, ఉమ్మడి కాలువల వద్ద కేంద్ర బలగాలను (సి.ఐ.ఎస్‌.ఎఫ్‌) నియమించాలన్నది నిర్ణయం. దీంతోపాటు బోర్డులకు 328 మంది సిబ్బంది అవసరమవుతారని అంచనా. టెలిమెట్రీ, ప్రాజెక్టుల నిర్వహణ.. ఇలా అన్నింటికి భారీ వ్యయమవుతుంది.

Leave a Reply

Your email address will not be published. Required fields are marked *

Next Post

కేంద్రం తీపికబురు.. ఏపీకి రూ.1,543కోట్లు, తెలంగాణకు రూ.2,155కోట్లు విడుదల

Fri Jul 16 , 2021
ఆంధ్రప్రదేశ్, తెలంగాణ సహా దేశంలోని అన్ని రాష్ట్ర ప్రభుత్వాలకు కేంద్రం గుడ్‌న్యూస్ అందించింది. ఆంధ్రప్రదేశ్‌కు రూ.1,543 కోట్లు, తెలంగాణకు రూ.2,155 కోట్లు విడుదల చేసింది.