యూపీలో కొత్తరకం కరోనా కలకలం.. తొలిసారి ‘కప్పా’ వేరియంట్ కేసులు

Delta Variant కరోనా మహమ్మారి రోజుకో కొత్త రూపం దాల్చి యాంటీబాడీలను ఏమార్చుతోందని పలు పరిశోధనలు వెల్లడించాయి. తాజాగా, దేశంలో మరోసారి కరోనా మ్యుటేషన్ చెందినట్టు గుర్తించారు.

ప్రధానాంశాలు:రెండు రోజుల కిందట యూపీలో డెల్టా ప్లస్ కేసులు.చనిపోయిన వ్యక్తి నమూనాల్లో కప్పా వేరియంట్.అప్రమత్తంగా ఉండాలని నిపుణులు హెచ్చరిక.కరోనా రెండో దశ వ్యాప్తిలో డెల్టా వేరియంట్ విజృంభించి దేశాన్ని అతలాకుతలం చేసింది. భారత్‌లోని గతేడాది అక్టోబరులో తొలిసారి గుర్తించిన ఈ వేరియంట్ వల్ల అనేక దేశాలు సతమతమవుతున్నాయి. ప్రస్తుతం యూకే, అమెరికాలో ఈ వేరియంట్ కేసులు పెద్ద సంఖ్యలో నమోదవుతున్నాయి. ఇతర వేరియంట్‌లతో పోల్చితే డెల్టా వేరియంట్ అత్యంత ప్రమాదకారిగా పరిణమించింది. అయితే, కరోనా వైరస్ జన్యు ఉత్పరివర్తనాలకు గురవుతూ కొత్త రూపం సంతరించుకుంటోంది. డెల్టా వేరియంట్ డెల్టా ప్లస్‌గా మారినట్టు పరిశోధకులు గుర్తించారు.

దేశంలో ఈ రకం కేసులు క్రమంగా పెరుగుతుండగా.. తాజాగా ఉత్తరప్రదేశ్‌లో మరో కొత్తరకం వేరియంట్ బయటపడింది. కప్పా వేరియంట్‌ను గుర్తించినట్టు యూపీ అధికారులు ప్రకటించారు. కప్పా వేరియంట్‌కు త్వరగా వ్యాపించే లక్షణమున్నట్టు భావిస్తున్నారు. లక్నోలోని కింగ్ జార్జి మెడికల్ కాలేజీలో నిర్వహించిన జీనోమ్ సీక్వెన్సింగ్ పరీక్షల అనంతరం కప్పా వేరియంట్‌ను నిర్ధారించారు. సంత్ కబీర్ నగర్‌కు చెందిన 66 ఏళ్ల వృద్ధుడిలో కప్పా వేరియంట్ గుర్తించారు. చనిపోయిన అతడి నమూనాలను సేకరించి జన్యు పరీక్షలు నిర్వహించారు.

ఈ పరీక్షల్లో కప్పా వేరియంట్ నిర్ధారణ అయ్యింది. జూన్ 13న నమూనాలను సేకరించి ఢిల్లీలోని సీఎస్ఐఆర్ జినోమిక్స్ ఇంటిగ్రేటివ్ బయాలజీ ఇన్‌స్టిట్యూట్‌కు తరలించగా.. ఫలితాలు కొద్ది రోజుల కిందట వచ్చాయి. వృద్ధుడికి మే 27న కోవిడ్ నిర్ధారణ కాగా.. జూన్ 12 సంత్ కబీర్ నగర్‌లోని బీఆర్డీ మెడికల్ కాలేజీ ఆస్పత్రిలో చేరానని మైక్రోబయాలజీ విభాగం హెడ్ డాక్టర్ అమ్రేశ్ సింగ్ తెలిపారు. నమూనాలను జూన్ 13న సేకరించామని, అతడు ఆ మర్నాడే చనిపోయాడని పేర్కొన్నారు.

కరోనా కొత్త వేరియంట్ ను రాష్ట్రంలో గుర్తించడంపై అధికారులు సీఎం యోగి ఆదిత్యనాథ్ కు సమాచారం అందించారు. దీనిపై ఉత్తరప్రదేశ్ అదనపు చీఫ్ సెక్రటరీ (ఆరోగ్యం) అమిత్ మోహన్ ప్రసాద్ స్పందిస్తూ, కప్పా వేరియంట్ పై ఆందోళన చెందాల్సిన అవసరంలేదని, దీనికి చికిత్స అందుబాటులో ఉందని వివరించారు. యూపీ నుంచి 2,000కిపైగా నమూనాలను జన్యు పరీక్షలకు పంపినట్టు అధికారులు తెలిపారు. ఇందులో 80 శాతం డెల్టా, 6 శాతం ఆల్ఫా, రెండు డెల్టా ప్లస్ కేసులుగా నిర్ధారణ అయ్యాయని అన్నారు.

Leave a Reply

Your email address will not be published. Required fields are marked *

Next Post

మూడు బడ్జెట్ ఫోన్ల రేట్లు పెంచిన శాంసంగ్.. వేటి ధరలు ఎంత పెరిగాయంటే?

Fri Jul 9 , 2021
శాంసంగ్ తన గెలాక్సీ ఎఫ్02ఎస్, గెలాక్సీ ఎం02ఎస్, గెలాక్సీ ఏ12 స్మార్ట్ ఫోన్ల ధరలను మనదేశంలో రూ.500 పెంచింది. ఇవి ఇప్పటికే పెరిగిన ధరలతో అందుబాటులో ఉన్నాయి.