మీ పాలనలో రోడ్లకు ఎంతటి మహర్ధశ.. ఆ వైభవాన్ని కళ్లారా చూడండి: ఎంపీ రఘరామ సెటైర్లు

వర్షాకాలం సీజన్లో రోడ్ల పరిస్థితి అత్యంత హీనంగా ఉన్న కారణంగా రాష్ట్ర రహదారుల శాఖకు చెందిన ఓ అధికారి రోడ్డు ప్రమాదంలో తీవ్రంగా గాయపడటం ప్రభుత్వ వైఫల్యానికి గుర్తుగా మిగిలిపోతుందని రఘురామ అన్నారు.

ఎన్నికల్లో ఇచ్చిన హామీలు, ప్రజా సమస్యలపై ఆంధ్రప్రదేశ్ ముఖ్యమంత్రి వైఎస్ జగన్మోహన్ రెడ్డికి ఎంపీ రఘురామకృష్ణరాజు వరుస లేఖలు రాస్తున్నారు. ఈ నేపథ్యంలోనే రాష్ట్రంలోని రహదారుల వాస్తవ పరిస్థితిపై మరో లేఖాస్త్రం సంధించారు.

ముఖ్యమంత్రి గారూ,
ప్రాంతం: పశ్చిమగోదావరి
ఏవండీ.. రాజుగారి ఇంటి అడ్రస్ కాస్త చెబుతారా?
తమ్ముడూ.. ఇక్కడ నుండి నాలుగు గోతులు దాటాక కుడివైపు తిరుగు.. మరలా ఓ పది గోతులు దాటాక ఒక పెద్ద గొయ్యి కనపడుతుంది. అక్కడ ప్యాంటు పైకి లాక్కుని ఆ గొయ్యి దాటు. అక్కడ నుండి ఎడమ వైపు తిరుగు.. మరలా ఆరు గోతులు దాటాక ఒక కరెంటు స్తంభం ఉంటుంది. ఆ పక్కనే ఆయన ఇల్లు. ఆ కరెంటు స్తంభం ముట్టుకోకు. స్తంభం నుంచి కరెంటు పాస్ అవుతోంది. షాక్ కొడుతుంది. ఇదీ స్థూలంగా రాష్ట్రంలో రోడ్ల పరిస్థితి. ఒక్క పశ్చిమ గోదావరి జిల్లాలోనే కాదు… రాష్ట్రంలోని అన్ని జిల్లాలలోనూ రహదారుల పరిస్థితి ఇలానే ఉంది.. అంటూ రఘురామకృష్ణరాజు లేఖలో పేర్కొన్నారు.

Also Read: ఫలించిన వైసీపీ వ్యూహం.. ఎంపీ రఘురామకృష్ణరాజుకు షాకిచ్చిన లోక్‌సభ స్పీకర్

ప్రస్తుత వర్షాకాలం సీజన్లో రోడ్ల పరిస్థితి అత్యంత హీనంగా ఉన్న కారణంగా రాష్ట్ర రహదారుల శాఖకు చెందిన ఓ అధికారి రోడ్డు ప్రమాదంలో తీవ్రంగా గాయపడటం ప్రభుత్వ వైఫల్యానికి గుర్తుగా మిగిలిపోతుందని రఘురామ అన్నారు.. రాష్ట్రంలో నిరంతరాయంగా కురుస్తున్న వర్షాలకు తోడు నైపుణ్యంలేని కాంట్రాక్టర్లకు పనులు అప్పగించడం వల్ల పరిస్థితి రోజు రోజుకూ మరింత దారుణంగా మారిపోతోందన్నారు. ప్రభుత్వం ప్రతి లీటరు పెట్రోల్, హైస్పీడ్ డీజిల్ నుంచి ఒక రూపాయి రోడ్డు సెస్ రూపంలో వసూలు చేస్తోందని.. ఈ మొత్తం ఏడాదికి సుమారు 500 కోట్లు ఆంధ్రప్రదేశ్ రోడ్డు డెవలప్ మెంట్ కార్పొరేషన్‌లో ఖాతాలో జమ అవుతున్నా.. ఆ కార్పొరేషన్ నుంచి వీసమెత్తు పని కూడా జరగడం లేదన్నారు.

ప్రభుత్వం సకాలంలో బిల్లులు చెల్లించకపోవడంతో ఫస్ట్ గ్రేడ్ కాంట్రాక్టర్లు రోడ్డు పనులు చేపట్టేందుకు ముందుకు రావడం లేదని ఎంపీ రఘురామ అన్నారు. ఈ కారణంగా కోస్తా తీర ప్రాంతాలలోని అన్ని రోడ్లూ కొట్టుకుపోయి యమకూపాలుగా మారిపోయాయన్నారు. రోడ్ డెవలప్ మెంట్ కార్పొరేషన్ నిధుల్లో దాదాపుగా రూ.3000 కోట్లను రాష్ట్ర ప్రభుత్వం తన ఇతర సంక్షేమ పథకాల కోసం దారి మళ్లించినట్లుగా కూడా తెలుస్తోందన్నారు. ప్రభుత్వం తనను నియోజకవర్గానికి దూరంగా ఉంచేందుకు నిరంతరాయంగా ప్రయత్నాలు చేస్తున్నా తాను క్షేత్ర స్థాయిలో జరుగుతున్న అన్ని వ్యవహారాలతోనూ సంబంధాలు కలిగే ఉన్నానని తెలిపారు.

ముఖ్యమంత్రి జగన్‌ని.. అశోక చక్రవర్తిలాగో, చంద్రగుప్త రాజులాగో మారిపోవాలని ప్రజలు కోరుకోవడం లేదని, రోడ్లు సక్రమంగా వేస్తే చాలనుకుంటున్నారని రఘురామ ఎద్దేవా చేశారు. సీఎం జగన్ కొంతకాలం పాటు హెలికాప్టర్లు, విమానాల్లో తిరగడం మానేసి రోడ్డుప్రయాణాలు చేస్తే ప్రజల కష్టాలు తెలుస్తాయన్నారు. అప్పుడైనా ముఖ్యమంత్రి రహదారుల అభివృద్ధిపై శ్రద్ధ చూపుతారని ఆశిస్తున్నానని రఘురామ పేర్కొన్నారు.

Leave a Reply

Your email address will not be published. Required fields are marked *

Next Post

కృష్ణా, గోదావరి బోర్డులపై కేంద్రం గెజిట్.. తెలంగాణ తీవ్ర ఆగ్రహం

Fri Jul 16 , 2021
తెలుగు రాష్ట్రాల్లోని ప్రాజెక్టులన్నీ కృష్ణా, గోదావరి బోర్డుల ఆధీనంలోకి వెళ్లనున్నాయి. ఉమ్మడి ప్రాజెక్టులైన శ్రీశైలం, నాగార్జునసాగర్‌తో సహా అన్నింటి నిర్వహణ ఇక నుంచి బోర్డులే చూసుకుంటాయి.