ఏపీ సీఐడీ డీజీ సునీల్‌కుమార్‌కు షాక్.. డిస్మిస్ చేయాలంటూ కేంద్రానికి ఫిర్యాదు

ఆంధ్రప్రదేశ్‌ సీఐడీ అదనపు డీజీ పీవీ సునీల్‌కుమార్‌ దళిత హిందువు కోటాలో ఉద్యోగం పొంది… క్రైస్తవునిగా మారినందున తక్షణమే ఉద్యోగం నుంచి తొలగించాలని మహారాష్ట్ర లీగల్‌ అబ్జర్వేటరీ (ఎల్‌ఆర్‌వో) కన్వీనర్‌ వినయ్‌ జోషి కేంద్రాన్ని కోరారు.

ప్రధానాంశాలు:వర్గాల మధ్య విభేదాలు రెచ్చగొడుతున్నారు..ఐపీఎస్‌ కొలువుకు అనర్హుడు.. సీఐడీ చీఫ్‌పై కేంద్రానికి మహారాష్ట్ర ఎల్‌ఆర్‌వో కన్వీనర్‌ ఫిర్యాదుమత మార్పిడి వ్యవహారంలో ఆంధ్రప్రదేశ్‌ సీఐడీ అదనపు డీజీ పీవీ సునీల్‌కుమార్‌ చిక్కుల్లో పడినట్లే కనిపిస్తుంది. దళిత హిందువు కోటాలో ఉద్యోగం పొందిన సునీల్ క్రిస్టియన్‌గా మారినందున తక్షణమే ఉద్యోగం నుంచి తొలగించాలని మహారాష్ట్ర లీగల్‌ అబ్జర్వేటరీ (ఎల్‌ఆర్‌వో) కన్వీనర్‌ వినయ్‌ జోషి కేంద్ర ప్రభుత్వాన్ని కోరారు. మతం మారిన వారికి కులం ద్వారా వచ్చే రిజర్వేషన్‌ వర్తించదని, ఒక కులం రిజర్వేషన్‌తో ఉద్యోగం పొందిన తర్వాత మతం మారితే కొలువు నుంచి తొలగించాలని ఇటీవల మద్రాసు హైకోర్టు సంచలన తీర్పు చెప్పిన సంగతి తెలిసిందే.

దీన్ని ఉదాహరణగా తీసుకునే సునీల్‌ను ఉద్యోగం నుంచి వినయ్ జోషి కేంద్రాన్ని కోరారు. ఎస్సీ, ఎస్టీలు క్రైస్తవులుగా మారితే ఆంధ్రప్రదేశ్‌లో బీసీ-సీ కేటగిరీలోకి వస్తారు. వారికి ఎస్సీ, ఎస్టీ రిజర్వేషన్‌ వర్తించదు. సునీల్‌ కుమార్‌ కూడా దళితుడి కోటాలో ఉద్యోగం పొంది… ఆ తర్వాత మతం మారారని జోషి ఆరోపించారు. దీంతో పాటు ఆయనపై పలు ఆరోపణలు చేస్తూ బుధవారం కేంద్ర హోంశాఖ కార్యదర్శి అజయ్‌కుమార్‌ భల్లాకు ఐదు పేజీల ఫిర్యాదు సమర్పించారు.

‘మద్రాస్‌ హైకోర్టు తాజా తీర్పు ప్రకారం… సునీల్‌ కుమార్‌కు ఎస్సీ రిజర్వేషన్‌ ద్వారా పొందిన సివిల్‌ సర్వీస్‌ ఉద్యోగంలో కొనసాగే అర్హత లేదు. ఈ వ్యవహారంపై తక్షణమే విచారణ జరిపి సునీల్‌ కుమార్‌ను ప్రభుత్వ సేవల నుంచి తొలగించాలి’’ అని జోషి కోరారు. ఆయన హిందూ వ్యతిరేక ప్రచారం చేయడంతో పాటు.. బడుగు, బలహీన వర్గాల మధ్య శత్రుత్వాన్ని రెచ్చగొడుతూ సాంఘిక వ్యతిరేక కార్యకలాపాలను ప్రోత్సహిస్తున్నారని ఆరోపించారు.

‘ప్రతిష్ఠాత్మకమైన ఐపీఎస్ సర్వీసులో ఉన్న సునీల్‌ కుమార్‌ హిందూమతంపై బహిరంగంగా విద్వేషం రెచ్చగొడుతున్నారు. అంబేడ్కర్‌ ఇండియా మిషన్‌ పేరిట కార్యకలాపాలు నిర్వహిస్తూ… హిందువుల మనోభావాలు దెబ్బతీసేలా, వివిధ వర్గాల మధ్య విభజన ప్రచారాన్ని కొనసాగించడంలో కీలకపాత్ర పోషిస్తున్నారు. సోషల్‌ మీడియా వేదిక ద్వారా ఆర్‌ఎస్ఎస్‌ భావజాలాన్ని వ్యతిరేకించడంతో పాటు వివిధ మతాల మధ్య విభేదాలు సృష్టిస్తున్నారు’ అని జోషి తన ఫిర్యాదులో పేర్కొన్నారు. సునీల్‌ కుమార్‌ చర్యలన్నీ సెంట్రల్‌ సివిల్‌ సర్వీసెస్‌ (కాండక్ట్‌) రూల్స్‌ 1964లోని 4(2)(3) నిబంధనలకు విరుద్ధమని తెలిపారు. సునీల్‌ కుమార్‌పై ఐపీసీలోని 153-ఏ, 295-ఏ సెక్షన్లతోపాటు ఐటీ సెక్షన్లు, చట్ట విరుద్ధ కార్యకలాపాల(నివారణ) చట్టం కింద ఎఫ్‌ఐఆర్‌ నమోదు చేయాలని డిమాండ్‌ చేశారు. సునీల్‌పై తక్షణమే శాఖాపరమైన చర్యలు తీసుకోవాలని.. ఆరోపణలు రుజువైతే సర్వీస్‌ నుంచి డిస్మిస్‌ చేయాలని జోషి డిమాండ్ చేశారు.

Leave a Reply

Your email address will not be published. Required fields are marked *

Next Post

త్వరలో లాంచ్ కానున్న రియల్‌మీ సీ21వై.. ధర రూ.10 వేలలోపే!

Thu Jun 10 , 2021
ప్రముఖ స్మార్ట్ ఫోన్ బ్రాండ్ రియల్‌మీ త్వరలో కొత్త ఫోన్ లాంచ్ చేయనుందని తెలుస్తోంది. అదే రియల్ మీ సీ21వై. దీనికి సంబంధించిన స్పెసిఫికేషన్లు కూడా ఆన్‌లైన్‌లో లీకయ్యాయి.