IND vs ENG: లీడ్స్‌ టెస్టులో భారత్ ఓటమి.. సిరీస్‌ని 1-1తో సమం చేసిన ఇంగ్లాండ్

ఇటీవల లార్డ్స్ టెస్టులో 151 పరుగుల తేడాతో గెలుపొందిన భారత్ జట్టు.. ఈరోజు లీడ్స్ టెస్టులో అనూహ్యంగా ఇన్నింగ్స్ 76 పరుగుల తేడాతో పేలవంగా ఓడిపోయింది. దాంతో.. సిరీస్ 1-1తో సమమైంది.

ప్రధానాంశాలు:లీడ్స్‌ టెస్టులో అనూహ్యంగా ఓడిపోయిన భారత్ఐదు టెస్టుల సిరీస్ 1-1తో సమం హాఫ్ సెంచరీలు బాదిన పుజారా, కోహ్లీ, రోహిత్ఐదు వికెట్లు తీసిన ఓలీ రాబిన్సన్ లీడ్స్ వేదికగా జరిగిన మూడో టెస్టులో భారత్ జట్టుకి ఊహించని పరాజయం ఎదురైంది. నాలుగు రోజుల్లోనే ముగిసిన ఈ మ్యాచ్‌లో ఆతిథ్య ఇంగ్లాండ్ టీమ్ ఇన్నింగ్స్ 76 పరుగుల తేడాతో భారత్ జట్టుని ఓడించింది. శనివారం ఓవర్‌నైట్ స్కోరు 215/2తో రెండో ఇన్నింగ్స్ కొనసాగించిన టీమిండియా అనూహ్యరీతిలో 278 పరుగులకే ఆలౌటైంది. దాంతో.. తాజా విజయంతో ఐదు టెస్టుల సిరీస్‌ని ఇంగ్లాండ్ 1-1తో సమం చేసింది. నాటింగ్‌హామ్ వేదికగా జరిగిన తొలి టెస్టు మ్యాచ్ చివరి రోజు వర్షం కారణంగా డ్రాగా ముగియగా.. లార్డ్స్‌లో జరిగిన రెండో టెస్టులో భారత్ 151 పరుగుల తేడాతో గెలుపొందిన విషయం తెలిసిందే. ఇక నాలుగో టెస్టు మ్యాచ్ సెప్టెంబరు 2 నుంచి కెన్నింగ్టన్ ఓవల్ వేదికగా జరగనుంది.

బుధవారం ప్రారంభమైన ఈ టెస్టు మ్యాచ్‌లో టాస్ గెలిచి మొదట బ్యాటింగ్ చేసిన భారత్ జట్టు 78 పరుగులకే కుప్పకూలిపోయింది. ఓపెనర్ రోహిత్ శర్మ (19) టాప్ స్కోరర్‌గా నిలవగా.. ఇంగ్లాండ్ పేసర్లు అండర్సన్, ఓవర్టన్ మూడేసి వికెట్లు తీశారు. అనంతరం మొదటి ఇన్నింగ్స్ ఆడిన ఇంగ్లాండ్ టీమ్.. కెప్టెన్ జో రూట్ (121: 165 బంతుల్లో 14×4) శతకం బాదడంతో 432 పరుగులు చేసింది. దాంతో.. ఇంగ్లాండ్‌కి 354 పరుగుల తొలి ఇన్నింగ్స్ ఆధిక్యం లభించింది. మహ్మద్ షమీ నాలుగు వికెట్లు పడగొట్టాడు.

354 పరుగుల లోటుతో శుక్రవారం రెండో ఇన్నింగ్స్ ప్రారంభించిన భారత్ జట్టులో రోహిత్ శర్మ (59: 156 బంతుల్లో 7×4, 1×6) హాఫ్ సెంచరీతో మళ్లీ జోష్ పెంచాడు. ఆ తర్వాత చతేశ్వర్ పుజారా (91: 189 బంతుల్లో 15×4), కెప్టెన్ విరాట్ కోహ్లీ (55: 125 బంతుల్లో 8×4) కూడా హాఫ్ సెంచరీలు నమోదు చేశారు. మూడో వికెట్‌కి 99 పరుగుల భాగస్వామ్యం నెలకొల్పిన కోహ్లీ- పుజారా జోడీ శనివారం అద్భుతం చేసేలా కనిపించారు. కానీ.. ఈరోజు ఆరంభంలోనే ఈ ఇద్దరూ తేలిపోయారు. ఆ తర్వాత వచ్చిన అజింక్య రహానె (10), రిషబ్ పంత్ (1), మహ్మద్ షమీ (6), ఇషాంత్ శర్మ (2), మహ్మద్ సిరాజ్ (0) వరుసగా పెవిలియన్‌కి క్యూ కట్టగా.. రవీంద్ర జడేజా (30: 25 బంతుల్లో 5×4, 1×6) చివర్లో తన హిట్టింగ్‌తో గెలుపు అంతరాన్ని కాస్త తగ్గించగలిగాడు. ఇంగ్లాండ్ పేసర్ ఓలీ రాబిన్సన్ ఐదు వికెట్లు పడగొట్టాడు.

Leave a Reply

Your email address will not be published. Required fields are marked *

Next Post

ఐఫోన్ 13 సిరీస్ లాంచ్ తేదీ లీక్.. వచ్చే నెలలోనే!

Sat Aug 28 , 2021
టెక్ దిగ్గజం యాపిల్ తన ఐఫోన్ 13 సిరీస్‌ను సెప్టెంబర్‌లో లాంచ్ చేయనున్నట్లు తెలుస్తోంది. సెప్టెంబర్ 14వ తేదీన ఈ ఫోన్లు ఎంట్రీ ఇవ్వనున్నట్లు వార్తలు వస్తున్నాయి.