AP New Governorగా యడియూరప్ప.. అసమ్మతి నేతల ఎత్తుగడేనా!

Karnataka BJP Rebels ఎలాగైనా సీఎంను మార్చాలని అసమ్మతి వర్గం పట్టుబడుతుంటే.. యడియూరప్ప మాత్రం తానే పూర్తికాలం కొనసాగుతానని ప్రకటించారు.

ప్రధానాంశాలు:తాత్కాలికంగా సద్దుమణిగిన కర్ణాటక సంక్షోభం.అరుణ్ సింగ్‌పై ఫిర్యాదుకు సిద్ధమైన రెబల్స్.యడ్డీని తప్పించాల్సిందేనంటున్న సీనియర్లు.కర్ణాటక బీజేపీ ప్రభుత్వంలో మొదలైన అసమ్మతి నివురుగప్పిన నిప్పు మాదిరిగా ఉంది. మరో రెండేళ్లూ యడియూరప్పే సీఎంగా ఉంటారని కర్ణాటక వ్యవహరాల ఇంఛార్జ్ అరుణ్ సింగ్ విస్పష్ట సంకేతాలిచ్చారు. అటు, యడియూరప్ప సైతం వచ్చే రెండేళ్లు తానే ముఖ్యమంత్రినని ప్రకటించుకున్నారు. అంతేకాదు, అసమ్మతి నాయకులతో అరుణ్‌ సింగ్‌ భేటీ కాలేదని, వారిని పట్టించుకునే అవసరం తనకు లేదని ఆయన తెగేసి చెప్పారు. మరోవైపు, సీఎం మార్పుపై ఎవరైనా మాట్లాడితే క్రమశిక్షణ కింద కఠిన చర్యలు తప్పవని రెవెన్యూ మంత్రి హెచ్చరించారు.

అటు, త్వరలో కొత్త సీఎం వస్తారని, యడ్డీని ఆంధ్రప్రదేశ్‌ గవర్నర్‌గా పంపేందుకు చర్యలు తీసుకుంటున్నారని అసమ్మతి నేతలు ప్రచారం చేస్తున్నారు. నాయకత్వ మార్పు అంశం సద్దుమణిగినట్టు యడియూరప్ప వర్గీయులు భావిస్తున్నప్పటికీ, అరుణ్‌ సింగ్‌పై అధిష్ఠానానికి ఫిర్యాదు చేయాలని అరవింద్‌ బెల్లద్‌, బసవనగౌడ పాటిల్‌ యత్నాళ్‌ తదితరులు తమ ప్రయత్నాలు కొనసాగిస్తున్నారు.

నాయకత్వ మార్పు అంశానికి అధిష్ఠానం విరామాన్ని మాత్రమే ఇచ్చిందని, సీఎం మార్పు తథ్యమని అసమ్మతి వర్గం పదే పదే వ్యాఖ్యలు చేయడం యడ్డీ అనుకూల వర్గానికి మింగుడు పడటం లేదు. గతవారం కర్ణాటకలో పర్యటించిన అరుణ్‌ సింగ్‌ సీఎం కుమారుడు విజయేంద్రను ప్రత్యేకంగా పిలిపించుకుని, మంత్రుల శాఖల్లో జోక్యం చేసుకోవద్దని తెగేసి చెప్పారు. మూడు రోజుల పర్యటనలో దాదాపు 60 మంది ఎమ్మెల్యేలతో విడివిడిగా మాట్లాడినా, వారంతా యడ్డీ వర్గానికి చెందినవారే.

తన పర్యటన ద్వారా అందరూ పార్టీ నాయకత్వానికి విధేయులుగా ఉండాలని అరుణ్‌సింగ్‌ స్పష్టమైన సంకేతాలు ఇచ్చారు. తాను ఎమ్మెల్యేగా తప్పుకుంటానని, తన కుమారుడు అమరనాథ్‌ జార్ఖిహొళికి మంత్రి పదవి ఇవ్వాలని మాజీ మంత్రి రమేశ్‌ జార్ఖిహొళి యడియూరప్పకు తన అనుయాయుల ద్వారా రాయబారం పంపారు.

అధిష్ఠానం ఆదేశిస్తే రాజీనామాకు సిద్ధమంటూనే, వచ్చే రెండేళ్లు ముఖ్యమంత్రిని తానేనంటూ యడ్డీ ప్రకటించుకున్నారు. కోరుకున్న రాష్ట్రానికి గవర్నర్‌గా యడ్డీని పంపి, కుమారుడికి డిప్యూటీ సీఎం పదవి ఇస్తామని అధిష్ఠానం సూచించినా, అందుకు ఆయన ససేమిరా అన్నట్టు తెలుస్తోంది. యడ్డీని తప్పిస్తే కర్ణాటకలో పట్టు, అధికారం కోల్పోతుందని బీజేపీ అధి నాయకత్వం యోచిస్తోంది. 2013 ఎన్నికల్లో ఎదురయిన అనుభవాలు కాషాయ పార్టీని వెంటాడుతున్నాయి.

అయితే, అసమ్మతి నేతలు వెనక్కుతగ్గడం లేదు. కర్ణాటక సీఎం కుమారుడుపై అవినీతి ఆరోపణలు గుప్పిస్తున్నారు. యడియూరప్ప కుమారుడు విజయేంద్ర పలు నీటిపారుదల ప్రాజెక్టుల్లో అక్రమాలకు పాల్పడ్డారని బీజేపీ ఎమ్మెల్సీ హెచ్‌.విశ్వనాథ్‌ శుక్రవారం ఆరోపించారు. ఆర్థిక శాఖ అనుమతి లేకున్నా నీటి పారుదాల ప్రాజెక్టులకు రూ.21,473 కోట్ల మేర టెండర్లను ఆహ్వానించారని ఆరోపించారు.

Leave a Reply

Your email address will not be published. Required fields are marked *

Next Post

శాంసంగ్ ఎం32 వచ్చేసింది.. రూ.15 వేలలోపే 6000 mah బ్యాటరీ.. అదిరిపోయే ఫీచర్లు కూడా!

Mon Jun 21 , 2021
శాంసంగ్ తన కొత్త స్మార్ట్ ఫోన్ గెలాక్సీ ఎం32ని మనదేశంలో లాంచ్ అయింది. దీని ధర రూ.14,999 నుంచి ప్రారంభం కానుంది. జూన్ 28వ తేదీ నుంచి సేల్ జరగనుంది.