హైదరాబాద్: నెల రోజుల వాన ఒక్క రోజులోనే.. నేడు, రేపు భారీ నుంచి అతి భారీ వర్షాలు

ఆకాశానికి చిల్లు పడిందా? అన్నట్టు హైదరాబాద్ నగరాన్ని భారీ వర్షం ముంచెత్తింది. ఇళ్లలోకి వరద నీరు చేరడంతో పలు ప్రాంతాల్లో ప్రజలు ప్రాణాలు అరచేతిలో పెట్టుకుని సురక్షిత ప్రాంతాలకు తరలివెళ్లారు.

ప్రధానాంశాలు:తెలంగాణలో రెండు రోజులుగా కురుస్తున్న భారీ వర్షాలు.హైదరాబాద్‌లో అత్యధికంగా 21.6 సెం.మీ. వర్షపాతం.పలు జిల్లాలకు నేడు, రేపు వర్షాలపై ఐఎండీ హెచ్చరిక.హైదరాబాద్ సహా తెలంగాణ వ్యాప్తంగా జోరు వర్షాలు కురుస్తున్నాయి. బుధవారం రాత్రి నుంచి హైదరాబాద్‌ను భారీ వర్షం ముంచెత్తింది ఆకాశానికి చిల్లు పడిందా అన్నట్లు వర్షం కురిసింది. ముఖ్యంగా ఉమ్మడి మెదక్‌, కరీంనగర్‌, నిజామాబాద్‌ జిల్లాలతో పాటు యాదాద్రి భువనగిరి జిల్లాల్లో భారీ వర్షాలు కురిశాయి. లోతట్టు ప్రాంతాలు జలమయం కాగా.. పలు చోట్ల రహదారులు కొట్టుకుపోయాయి. చెరువు కుంటలు మత్తడి దూకుతున్నాయి. కొన్ని ప్రాంతాల్లో ఆయా గ్రామాల మధ్య రోడ్డుపై ఉన్న లోతట్టు వంతెనలు మునిగిపోవడంతో రాకపోకలు నిలచిపోయాయి.

పలు చోట్ల విద్యుత్తు స్తంభాలు నేలకూలాయి. బుధవారం ఉదయం నుంచి గురువారం ఉదయం వరకు 24 గంటల్లో 268 ప్రాంతాల్లో భారీ వర్షాలు కురిశాయి. గరిష్ఠంగా మెదక్‌ జిల్లా చేగుంట, హైదరాబాద్‌లో రెండు చోట్ల 21.6 సెం.మీటర్లు నమోదయింది. మేడ్చల్‌ మల్కాజిగిరి జిల్లా ఉప్పల్‌లో 16.1, రంగారెడ్డి జిల్లా హయత్‌నగర్‌లో 15.6, యాదాద్రి భువనగిరి జిల్లా కేంద్రంలో 15, యాదగిరిగుట్టలో 13.6, సరూర్‌నగర్‌లో 13 సెం.మీటర్ల వర్షం నమోదయింది. దాదాపు అన్ని జిల్లాల్లోనూ వర్షాలు కురిశాయి.

హైదరాబాద్‌లో కుండపోత వర్షం కురిసింది. అత్యధిక ప్రాంతాల్లో 10 నుంచి 20 సెంటీమీటర్ల వర్షపాతం నమోదయ్యింది. 12 గంటల్లో ఈ స్థాయి వర్షం కురువడం ఈ ఏడాదిలో ఇదే తొలిసారి. అబ్దుల్లాపూర్‌మెట్‌ మండలం తట్టిఅన్నారంలో అత్యధికంగా 21.6 సెం.మీ, ఉప్పల్‌ పరిధిలోని బండ్లగూడలో 21.3 సెం.మీ. వర్షం కురిసింది. హయత్‌నగర్‌, వనస్థలిపురం, ఎల్బీనగర్‌, దిల్‌సుఖ్‌నగర్‌, మలక్‌పేట, సరూర్‌నగర్‌, ఉప్పల్‌, చిలుకానగర్‌, రామంతాపూర్‌, నాగోలు, బండ్లగూడల్లో భారీ వర్షానికి రహదారులపై వరద నీరు భారీగా చేరింది.

ఆయా ప్రాంతాల్లోని దాదాపు 60కుపైగా కాలనీలు ముంపులో చిక్కుకున్నాయి. నాగోలు సమీపంలోని బండ్లగూడ చెరువులోకి భారీ వరద చేరడంతో దానికి అనుకుని ఉన్న అయ్యప్పకాలనీ, మల్లికార్జున నగర్‌లో ఇళ్లలో నడుములోతు వరకు నీరు చేరింది. రాత్రికి రాత్రే కాలనీలో చాలా కుటుంబాలు ఇళ్లను ఖాళీ చేసి సురక్షిత ప్రాంతాలకు తరలివెళ్లాయి. మరికొందరు ఇళ్లపైకి చేరి ప్రాణాలు కాపాడుకున్నారు. జులైలో సాధారణ వర్షపాతం మేడ్చల్‌ జిల్లాలో 16.8 సెం.మీ, రంగారెడ్డిలో 14.1 సెం.మీ., హైదరాబాద్‌లో 17.4 సెం.మీ.గా ఉంది. అయితే, గురువారం ఒక్క రోజే నెల సగటు మొత్తాన్ని మించి కురిసింది.

కాగా, శుక్ర, శనివారాల్లో రాష్ట్రంలోని పలు జిల్లాల్లో భారీ నుంచి అతి భారీ వర్షాలు కురిసే అవకాశాలున్నాయని వాతావరణ శాఖ తెలిపింది. మేడ్చల్‌ మల్కాజిగిరి, మెదక్‌, కామారెడ్డి, సంగారెడ్డి, వికారాబాద్‌, రంగారెడ్డి, సిద్దిపేట, వరంగల్‌ అర్బన్‌, గ్రామీణం, మహబూబాబాద్‌, కరీంనగర్‌, రాజన్న సిరిసిల్ల జిల్లాలకు వాతావరణశాఖ హెచ్చరికలు జారీ చేసింది. హైదరాబాద్‌లో కొన్నిచోట్ల మోస్తరు వర్షాలు, పలు చోట్ల జల్లులు కురిసే అవకాశముందని సూచించింది.

Leave a Reply

Your email address will not be published. Required fields are marked *

Next Post

జగన్ సర్కార్ మరో షాక్.. పదేళ్ల పాటు ప్రజలపై భారం.. టార్గెట్ రూ.6వేల కోట్లు

Fri Jul 16 , 2021
పెట్రోల్, డీజిల్‌పై వసూలు చేస్తున్న రహదారి పన్ను భారాన్ని రాష్ట్ర ప్రభుత్వం పదేళ్ల పాటు వసూలు చేయనుంది. బ్యాంకు వద్ద తీసుకుంటున్న రుణాలకు దీన్ని హామీగా చూపించడంతో ప్రజలకు భారం తప్పేలా లేదు.