హైతీ అధ్యక్షుడి దారుణ హత్య.. అర్ధరాత్రి ఇంట్లో దూరి దుండగులు కాల్పులు

ఉత్తర అమెరికాలోని పేద దేశమైన హైతీ అధ్యక్షుడి హత్యతో మరింత సంక్షోభంలో కూరుకుపోయింది. ఏకంగా దేశాధ్యక్షుడిని ఇంటిలోనే కాల్చి చంపారు.

ప్రధానాంశాలు:కరేబియన్ దేశంలో తాండవం చేస్తున్న పేదరికం.ఎన్నికల్లో అక్రమాలకు పాల్పడినట్టు ఆరోపణలు.పదవీకాలం ముగిసినా పీఠం దిగన జొవెనెల్ మోయిస్.హైతీ అధ్యక్షుడు జొవెనెల్‌ మోయిస్‌ (53) హత్యకు గురయ్యారు. స్థానిక కాలమానం ప్రకారం మంగళవారం అర్ధరాత్రి దాటిన తర్వాత ఆయనను గుర్తుతెలియని వ్యక్తులు కాల్పిచంపారు. అధ్యక్షుడి ప్రయివేటు నివాసంలోనే ఈ ఘటన చోటుచేసుకోగా.. జొవెనెల్ భార్య మార్టినే మోయిస్‌ తీవ్రంగా గాయపడ్డారు. ఆమె ప్రస్తుతం ఆసుపత్రిలో చావుబతుకుల మధ్య కొట్టుమిట్టాడుతోంది. అధ్యక్షుడి హత్యను తాత్కాలిక ప్రధాని క్లాడ్‌ జోసెఫ్‌ ధ్రువీకరించారు. ‘సాయుధ కమాండో గ్రూపు’ సభ్యులే ఇందుకు కారణమని ఆయన ఆరోపించారు.

ఈ హత్యలో విదేశీ వ్యక్తుల ప్రమేయం ఉందని… ఇంగ్లిష్‌, స్పానిష్‌ భాషలు మాట్లాడిన విదేశీయులే ఘాతుకానికి పాల్పడినట్టు తెలిపారు. ఇది ‘విద్వేషపూరితం, అమానుషం, ఆటవికం’ అని వ్యాఖ్యానించిన ఆయన.. ప్రస్తుతం అధ్యక్ష బాధ్యతలను కూడా తానే నిర్వహించనున్నట్టు ప్రకటించారు. హైతీలో పేదరికం, అవినీతి, రాజకీయ అస్థిరత, ధరలు ముఖ్యంగా పెట్రోల్ ధరలు పెరుగుదల, ఆర్థిక తిరోగమనం, అభద్రత ఇందుకు కారణమని పరిశీలకులు భావిస్తున్నారు.

ఆహారం, ఇంధనం లభ్యత కష్టతరంగా మారింది. కరేబియన్ దేశాల్లో అత్యంత పేదరిక దేశం హైతీలో అయితే నిరంకుశత్వం, లేదంటే రాజకీయ అస్థిరత అన్ని చందంగా పరిస్థితులు ఉంటున్నాయి. రాజధాని పోర్ట్‌ ఆఫ్‌ ప్రిన్స్‌ సహా పలు చోట్ల సాయుధ ముఠాల కిడ్నాప్‌లు, దౌర్జన్యాలు సర్వసాధారణంగా మారాయి. రాజధానిలో వీధులపై ఆధిపత్యం కోసం ఈ ముఠాల మధ్య ఘర్షణలు కూడా ఎక్కువయ్యాయి. కొన్నిసార్లు పోలీసులతోనూ తలపడుతుంటాయి. దీంతో వేలాది మంది నిరాశ్రయులు కావడం కొత్త సమస్యను తెచ్చిపెడుతున్నాయి.

పార్లమెంటు లేకుండానే అధ్యక్షుడు పాలన సాగించడం కూడా తీవ్ర అసంతృప్తికి కారణమయింది. ఇదిలా ఉండగా, అధ్యక్షుడు జొవెనెల్ మోయిస్ హత్యకు పాల్పడిన నలుగురి అనుమానితుల్లో ఇద్దర్ని పోలీసులు కాల్చి చంపినట్టు హైతీ పోలీస్ చీఫ్ తెలిపారు. మరో ఇద్దర్ని అరెస్ట్ చేసినట్టు ఆయన పేర్కొన్నారు. ఇక, వ్యాపారవేత్త అయిన మోయిస్‌ 2015లో రాజకీయ రంగ ప్రవేశం చేశారు. దేశాన్ని పునర్నిర్మిస్తానంటూ హామీలు ఇచ్చారు. పలు ప్రజాకర్షక పథకాలు అమలు చేస్తానని తెలిపారు.

అయితే, ఆ ఎన్నికల్లో మోయిస్ విజయం సాధించినా ఆయన అక్రమాలకు పాల్పడ్డారంటూ ప్రజాందోళనలు జరిగాయి. 2016లో జరిగిన రెండో రౌండు ఎన్నికల్లోనూ ఆయన విజయం సాధించినట్టు అధికారులు ప్రకటించారు. దీనిపైనా నిరసనలు వెల్లువెత్తాయి. చివరకు కోర్టు తీర్పుతో ఆయన 2017 ఫిబ్రవరిలో అధ్యక్ష బాధ్యతలు చేపట్టారు. అధ్యక్ష పదవికి అయిదేళ్ల కాలపరిమితి కాగా, అది ఇప్పుడు వివాదాస్పదమయింది. తన పదవీకాలం 2022 ఫిబ్రవరి 7 వరకు ఉందని మోయిస్‌ వాదించారు. అయితే ఎన్నికలు నిర్వహించిననాటి నుంచి లెక్కవేసుకుంటే అది 2021 ఫిబ్రవరి 7కే పూర్తయిందని విపక్షాలు అంటున్నాయి.

Leave a Reply

Your email address will not be published. Required fields are marked *

Next Post

కెయిర్న్ ఎనర్జీ కేసులో ఎదురుదెబ్బ.. ఫ్రాన్స్‌లో భారత ఆస్తుల జప్తునకు ఫ్రెంచ్ కోర్టు ఆదేశం!

Thu Jul 8 , 2021
వేదాంతలోని ఐదు శాతం కెయిర్న్‌‌ ఎనర్జీ షేర్లను భారత ప్రభుత్వం అటాచ్‌ చేసి, రూ.1,140 కోట్ల డివిడెండ్లు, రూ.1,590 కోట్ల ట్యాక్స్‌ రీఫండ్‌ను నిలిపివేయడంతో ఆ సంస్థ అంతర్జాతీయ న్యాయస్థానాన్ని ఆశ్రయించింది.