Bengal by Polls బెంగాల్‌లో బీజేపీ మరో షాక్.. టీఎంసీలో చేరిన బాబుల్ సుప్రియో

కేంద్ర క్యాబినెట్ నుంచి తప్పించిన తర్వాత మనస్తాపానికి గురైన బాబుల్ సుప్రియో.. పార్లమెంట్ సభ్యత్వానికి రాజీనామా చేసి రాజకీయాల నుంచి వైదొలగుతున్నట్టు ప్రకటించారు.

ప్రధానాంశాలు:సెప్టెంబరు 30 న ఉప-ఎన్నికల పోలింగ్.గత నెల బీజేపీకి రాజీనామా చేసిన బాబుల్.టీఎంసీ కండువా కప్పుకున్న మాజీ కేంద్ర మంత్రి.పశ్చిమ్ బెంగాల్‌లో ఉప-ఎన్నికల ముందు భారతీయ జనతా పార్టీ (బీజేపీ)కి మరో ఎదురుదెబ్బ తగిలింది. బెంగాల్ అసెంబ్లీ ఎన్నికల తర్వాత పలువురు బీజేపీ నేతలు తృణమూల్ కాంగ్రెస్‌లో చేరుతున్న విషయం తెలిసిందే. తాజాగా, కేంద్ర మాజీ మంత్రి, ఇటీవల బీజేపీకి రాజీనామా చేసి లోక్‌సభ సభ్యుడు బాబుల్ సుప్రియో టీఎంసీలో చేరారు. బాబుల్ టీఎంసీలో చేరడంతో బీజేపీ నుంచి వచ్చిన నేతల సంఖ్య ఐదుకు చేరింది. ఇప్పటి వరకూ నలుగురు బీజేపీ ఎమ్మెల్యేలు టీఎంసీ తీర్థం పుచ్చుకున్నారు.

ఇక, జులైలో జరిగిన కేంద్ర క్యాబినెట్ విస్తరణలో బాబుల్‌ను మంత్రి పదవి నుంచి తప్పించారు. దీంతో మనస్తాపానికి గురైన ఆయన పార్లమెంట్ సభ్యత్వానికి, బీజేపీకి రాజీనామా చేశారు. అంతేకాదు, రాజకీయాల నుంచి వైదొలగుతున్నట్టు ప్రకటించారు. కానీ, నెలన్నర తర్వాత అనూహ్యంగా మళ్లీ టీఎంసీలో చేరారు. 2014 నుంచి కేంద్రంలో వివిధ శాఖలకు సహాయ మంత్రిగా బాధ్యతలు నిర్వహించిన ఆయన క్యాబినెట్ నుంచి తప్పించడంతో తీవ్ర నిరుత్సాహానికి గురయ్యారు. అసన్‌సోల్‌ నుంచి ఆయన రెండు సార్లు బీజేపీ నుంచి ఎంపీగా ఎన్నికయ్యారు.

బెంగాల్ అసెంబ్లీ ఎన్నికల్లో బీజేపీ తరఫున పోటీచేసి తృణమూల్‌ అభ్యర్థి చేతిలో ఓడిపోయారు. రాజకీయ సన్యాసం తీసుకుంటున్నట్టు ఫేస్‌బుక్ ద్వారా వెల్లడించిన బాబుల్ సుప్రియో..‘‘అల్విదా.. తల్లిదండ్రులు, భార్య, స్నేహితులతో మాట్లాడాను.. వారి సలహా తీసుకున్న మేరకు రాజకీయాలను విడిచిపెడుతున్నా.. ఏ పార్టీలోనూ చేరడం లేదు. ఎవరూ నన్ను సంప్రదించలేదు. నేను ఎక్కడికీ వెళ్లడం లేదు. సామాజిక సేవలో పాల్గొంటాను. సమాజ సేవకు రాజకీయాలే అవసరం లేదు’’ అని పేర్కొన్నారు.

Leave a Reply

Your email address will not be published. Required fields are marked *

Next Post

మోదీకి ప్రత్యామ్నాయం మమతానే.. రాహుల్ కాదు.. టీఎంసీ పత్రిక సంచలన కథనం!

Sat Sep 18 , 2021
మోదీ నాయకత్వంలోని శక్తివంతమైన బీజేపీని దీటుగా ఎదుర్కొనే నేత ఎవరనేదీ.. కళ్లలో ఒత్తులు వేసుకుని వెదికినా దొరకడం లేదు. అయితే, బెంగాల్ ఎన్నికల్లో విజయంతో మమతా బెనర్జీ పేరు మార్మోగుతోంది.