ఊపిరిని ఇలా బిగబెడితే కరోనా ఉందో లేదో తెలుస్తుందా? ఇందులో నిజమెంతా?

ఊపిరిని బిగబెట్టడం ద్వారా మీకు కరోనా వైరస్ ఉందో లేదో సులభంగా తెలుసుకోవచ్చంటూ వీడియోలు వస్తున్నాయా? అయితే, మీరు తప్పకుండా ఈ విషయం తెలుసుకోవాలి. లేకపోతే ప్రమాదంలో పడతారు.

కరోనా వైరస్‌ను అడ్డుకొనేందుకు శాస్త్రవేత్తలు, వైద్య నిపుణులు జుట్టు పీక్కుంటుంటే.. ‘సోషల్ మీడియా పరిశోధకులు’ మాత్రం ఏవేవో కనిపెట్టేస్తున్నారు. తెలిసీ.. తెలియని పరిజ్ఞానంతో ఏవేవో కథలు అల్లేసి జనాల ప్రాణాలతో ఆడుకుంటున్నారు. ఇలా చేస్తే కరోనా రాదని, అలా చేస్తే కరోనా చచ్చిపోతుందంటూ కొత్త కొత్త మెసేజులు పంపిస్తూ.. దేశ సేవ చేస్తున్నంతగా ఫీలైపోతున్నారు. అయితే, ఈ మెసేజులు కరోనా కంటే ప్రమాదకరం. ముఖ్యంగా ఈ సెకండ్ వేవ్‌లో మరింత అప్రమత్తంగా ఉండాలి. ఎందుకంటే.. ఇప్పుడు కరోనా లక్షణాలు బయట పడటం లేదు. వైరస్ శరీరంలోకి ప్రవేశించి.. బాగా ముదిరిన తర్వాతే బయటపడుతోంది. చివరికి కోవిడ్-19 టెస్టులకు కూడా ఈ మహమ్మారి చిక్కడం లేదు. నెగటివ్ రిపోర్టు రావడంతో చాలామంది తమకు ఏమీ లేదులే అనే నిర్లక్ష్యంతో వ్యవహరిస్తున్నారు. దీంతో వైరస్ ఆ వ్యక్తుల కుటుంబం మొత్తం పాకుతూ సర్వనాశనం చేస్తోంది. దీనికి తోడు.. వాట్సాప్, ఫేస్‌బుక్‌లో షేరవుతున్న అడ్డమైన మెసేజులు కూడా జనాల్లో నిర్లక్ష్యానికి కారణమవుతున్నాయి. ప్రజల ప్రాణాలు హరిస్తున్నాయి.

తాజాగా వాట్సాప్‌లో ‘ఊపిరి టెస్ట్’ అంటూ ఒకటి వైరల్‌గా చక్కర్లు కొడుతోంది. మీరు ఇంట్లో కూర్చొనే కోవిడ్-19 ఉందో లేదో తెలుసుకోవచ్చట. ఇందుకు జస్ట్ ఊపిరి బిగబడితే చాలట. మరి, ప్రభుత్వం అంత ఖర్చుపెట్టి ఆర్టీపీసీఆర్, ర్యాపిడ్ టెస్టులను ఎందుకు చేస్తోందో? ఇక ఆ మెసేజ్ విషయానికి వస్తే.. 21 సెకన్ల ఈ వీడియోలో మొత్తం నాలుగు పాయింట్లు ఉన్నాయి. మొదటి పాయింట్ బ్రీత్ ఇన్‌.. అంటూ ఊపిరిని లోపలికి పీల్చుకోవాలని ఉంది. రెండో పాయింట్ అంటే.. A నుంచి మూడో పాయింటైన B వరకు ఊపిరి బిగపట్టి ఉంచాలి. తర్వాత శ్వాసను వదిలేయాలి. అలా A నుంచి B వరకు ఊపిరి బిగబట్టి ఉండగలిగితే మీకు కరోనా లేనట్లేనని ఆ వీడియోలో చెబుతున్నారు. దీంతో అంతా ఇదే పనిలో ఉండి. ఎవరికివారు తమకు కరోనా లేదని డిసైడ్ అయిపోతున్నారు.

ఇందులో నిజమెంతా?: ఈ ‘ఊపిరి టెస్ట్’పై అమెరికాకు చెందిన ప్రముఖ వైద్య నిపుణులు డాక్టర్ ఫహీమ్ యునస్ ట్విట్టర్ ద్వారా స్పందించారు. దీన్ని అస్సలు నమ్మవద్దని, ఇది చాలామందిని తప్పుతోవ పట్టిస్తోందని ఆయన స్పష్టం చేశారు. దీన్ని అస్సలు ప్రయత్నించవద్దని కోరారు. ఊపిరిని నిలిపేసి.. ప్రయోగాలు చేస్తే శరీరంలోని ముఖ్యమైన భాగాలకు ఆక్సిజన్ సరఫరా నిలిచిపోతుందని, అలాంటి పనులు చేయొద్దని వైద్య నిపుణులు హెచ్చరిస్తున్నారు. తెలిసిందిగా.. ఇప్పటికైనా మీరు ఇలాంటి మెసేజులతో అప్రమత్తంగా ఉండండి. ఇవి కరోనా కంటే హానికరం. ఇలాంటివి మీ స్నేహితులను షేర్ చేస్తున్నారంటే.. మీరు వారి ప్రాణాలను ప్రమాదంలోకి నెడుతున్నట్లే.
కోవిడ్-19 వ్యాక్సిన్ రిజిస్ట్రేషన్ ఎలా చేసుకోవాలి? నిబంధనలు ఏమిటీ? యూరిన్ థెరపీ.. మూత్రం తాగడం ఆరోగ్యకరమా?

Leave a Reply

Your email address will not be published. Required fields are marked *

Next Post

పెళ్లికి 100 మంది అతిథులు.. కటకటాల్లో వరుడు.. కారణం విని షాకైన పోలీసులు

Mon Apr 26 , 2021
కోరనా నిబంధనలు పాటించకుండా పెళ్లి చేసుకున్న వరుడిని పంజాబ్‌లోని జలంధర్ పోలీసులు అరెస్ట్ చేశారు. పెళ్లి, రిసెప్షన్ కార్యక్రమానికి 100 మందికి పైగా హాజరు కావడంతోనే పోలీసులు వారికి షాకిచ్చారు.