రాజకీయాల్లో NTR సక్సెస్‌కు కారణం అదే.. జస్టిస్ ఎన్వీ రమణ ఆసక్తికర వ్యాఖ్యలు

జపాన్‌, చైనా దేశాలు పరాయి భాషల మోజులో పడలేదు. ఆ దేశాలు తమ భాషలోనే విద్యను బోధిస్తూ అన్ని రంగాల్లో అగ్రస్థాయికి చేరుకోగలుగుతున్నాయని జస్టిస్ ఎన్వీ రమణ వ్యాఖ్యానించారు.

ప్రధానాంశాలు:తెలుగును నిర్లక్ష్యం చేస్తున్నారని సీజేఐ ఆవేదన.సామాన్యులకు అర్థమయ్యే భాషే ఎన్‌టీఆర్‌కు వరం.తెలుగును సోషల్ మీడియా ఖూనీ చేస్తోందని విమర్శలు.వ్యవహారిక భాషా పితామహుడు, గిడుగు వేంకట రామమూర్తి పంతులు 158వ జయంతి సందర్భంగా ‘వీధి అరుగు’ నార్వే, దక్షిణాఫ్రికా తెలుగు సంఘాల సంయుక్తంగా నిర్వహించిన ‘తెలుగు భాషాదినోత్సవం-2021’ వేడుకల్లో సీజేఐ జస్టిస్ ఎన్వీ రమణ ముఖ్య అతిథిగా పాల్గొన్నారు. రెండు రోజులపాటు కొనసాగే ఈ కార్యక్రమాన్ని ప్రపంచవ్యాప్తంగా విభిన్న దేశాల్లోని 75కిపైగా తెలుగు సంస్థల సమన్వయం చేస్తున్నాయి. తొలిరోజు శనివారం కార్యక్రమానికి సుప్రీంకోర్టు చీఫ్ జస్టిస్ విర్చువల్‌గా పాల్గొని ప్రసంగించారు.

ఈ సందర్భంగా మాతృభాష మనిషి ఉన్నతికి సోపానమే కాని అవరోధం కాబోదని అన్నారు. ప్రపంచంలో ఉన్నత స్థాయికి ఎదుగుతున్న సమాజాలన్నీ వాటి మాతృభాషలోనే విద్యాబోధనను కొనసాగిస్తున్నాయని ఆయన స్పష్టం చేశారు. మన అమ్మ భాష గతంలో ఎన్నడూలేనంత ప్రమాదాన్ని ఎదుర్కొంటోందని సీజేఐ ఆవేదన వ్యక్తం చేశారు. తెలుగును పరిరక్షించుకునేందుకు భాషాభిమానులందరూ నడుంబిగించాలని Enl పిలుపునిచ్చారు.

‘‘చైతన్యవంతమైన తెలుగు సమాజం నిరంతరం అప్రమత్తంగా ఉంటూ ఎప్పటికప్పుడు భాషలో దిద్దుబాట్లు, సర్దుబాట్లు చేసుకుంటూ మనుగడ కొనసాగిస్తోంది.. ముందు చూపుతో తగిన మార్పులతో భాషను ప్రగతిశీలమైనదిగా మలిచిన యుగ పురుషుల్లో గిడుగు వేంకట రామమూర్తి పంతులు అగ్రగణ్యులు.. దాదాపు సమకాలికులైన కందుకూరి వీరేశలింగం పంతులు, గురజాడ అప్పారావు, గిడుగు రామ్మూర్తిల త్రయం… సాహితీ సామాజిక సంస్కరణలతో తెలుగును సామాన్య ప్రజల భాషగా మలిచారు.

భాష అనేది స్వాతంత్య్రానికి, స్వేచ్ఛకు సంకేతం.. మానవ సంబంధాలకు ఆధారం.. భావాలకు దర్పణం.. ప్రపంచవ్యాప్తంగా విముక్తి కోసం సాగిన ప్రతి ఉద్యమానికి మాతృభాషే మాధ్యమం.. భారత స్వాతంత్య్ర పోరాటంలో గరిమెళ్ల సత్యనారాయణ ‘మా కొద్దీ తెల్ల దొరతనం’, త్రిపురనేని రామస్వామి చౌదరి ‘వీరగంధము తెచ్చినారము వీరుడెవ్వరో తెల్పుడీ’, రాయప్రోలు వారి ‘ఏ దేశమేగినా, ఎందు కాలిడినా’, చిలకమర్తి వారి ‘భరత ఖండంబు చక్కని పాడియావు, దాశరథి వారి ‘నా తెలంగాణ కోటి రతనాల వీణ’ లాంటి ఎన్నెన్నో రచనలు తెలుగు జాతిని ఉర్రూత లూగించాయి’’ అన్నారు.

‘తెలుగు భాషకు ఘన చరిత, సంఖ్యాపరంగా ఎంతో ప్రాభవం ఉన్నా, అణకువ, అణగిమణగి ఉండే తెలుగోడి స్వభావం కారణంగా రావల్సినంత ప్రాముఖ్యత రాలేదనే చెప్పుకోవాలి. స్వాతంత్య్రం వచ్చాక తెలుగు భాషనూ, తెలుగుదనాన్నీ, మళ్లీ ఎంతో చాకచక్యంగా ఉపయోగించి తెలుగు ప్రజలను ఆవేశపరిచి, వారి అభిమానాన్ని చూరగొన్న ఘట్టాన్ని మా తరం స్వయంగా చూడగలిగింది..

నందమూరి తారక రామారావు సినీ ప్రాభవం, స్ఫురద్రూపం, రాజకీయ అనుకూలతలు, చైతన్య రథపు వినూత్న ప్రయోగం ఇవన్నీ ఒక ఎత్తు. కానీ ఊరూరా తిరిగి, సరళమైన సామాన్యుడి భాషలో, అద్భుతమైన ఉచ్ఛారణతో, అనర్గళంగా ప్రసంగించి తెలుగువాడి ఆత్మగౌరవాన్ని తట్టిలేపిన ఆయన వాక్చాతుర్యం మరో ఎత్తు. ఆయన విజయంలో అదే కీలక పాత్ర పోషించింది’ అని తెలిపారు.

‘1980వ దశకం ఆరంభం వరకు మనల్ని మదరాసీలుగా జమ కట్టేవారు.. తెలుగు ఆత్మ గౌరవానికి, భాషకు, సంస్కృతికి రామారావు ఇచ్చిన ప్రాధాన్యం కారణంగా తెలుగు జాతికి గల ప్రత్యేకతను మిగతా ప్రపంచం గుర్తించడం ప్రారంభించింది.. దురదృష్టవశాత్తు ఆ తర్వాతి తరం నేతల్లో అతి కొద్ది మంది మాత్రమే సాటి ప్రజలతో రామారావులా సునాయాసంగా మాట్లాడగలుగుతున్నారు.. హోదాలో ఉన్నవారు తప్పుల తడకలు, తడబాట్లతో మాట్లాడే మాటలే ప్రామాణికంగా చెల్లుబాటవుతున్నాయి’ అని వ్యాఖ్యానించారు

భాషను వధించడంలో సోషల్ మీడియా తన వంతు పాత్రను పోషిస్తున్నాయి.. తెలుగు సినిమా అర్థం కావాలంటే ఆంగ్లంలో సబ్‌ టైటిల్స్‌ చూడాల్సిన పరిస్థితి దాపురించిందన్నారు. తెలుగు భాషను కాపాడాల్సిన బాధ్యత ప్రసార మాధ్యమాలపైనా ఉందని, వార్తాపత్రికలు నేటికీ భాషకు తగిన ప్రాధాన్యతనిస్తూ పరిశోధనకు వెచ్చిస్తూ తెలుగును నిలబెడుతున్నాయన్నారు.

Leave a Reply

Your email address will not be published. Required fields are marked *

Next Post

వైఎస్ క్యాబినెట్‌లో పనిచేసిన మంత్రులు, సహచరులకు విజయమ్మ ఆహ్వానం!

Sun Aug 29 , 2021
దివంగత ముఖ్యమంత్రి వైఎస్ రాజశేఖర్ రెడ్డి సతీమణి విజయమ్మ.. ఆయన మంత్రివర్గంలో పనిచేసిన సభ్యులు, రాజకీయ సహచరులకు ఫోన్‌చేసి వర్దంతి కార్యక్రమానికి ఆహ్వానిస్తున్నారు.