జగన్ సర్కారుకు కేంద్రం షాక్.. ఆ నిధుల ఖర్చుపై నివేదిక అందజేయాలని లేఖ

ఆంధ్రప్రదేశ్ ప్రభుత్వం పలు విదేశీ, అంతర్జాతీయ సంస్థల నుంచి తీసుకున్న రుణాలకు సంబంధించి సమగ్ర నివేదికను కోరుతూ కేంద్ర ఆర్ధిక శాఖ లేఖ రాసింది.

ప్రధానాంశాలు:విదేశీ సంస్థల నుంచి ఏపీ ప్రభుత్వం నిధులు.అడ్వాన్సుల తీసుకుని ఖర్చుచేయని సర్కారు.వివరాలు అందజేయాలని కేంద్రం కీలక లేఖ.ఆంధ్రప్రదేశ్‌లో అభివృద్ధి కార్యక్రమాల కోసం విదేశీ సంస్థల నుంచి తీసుకున్న రుణాలకు సంబంధించి జగన్ సర్కారును కేంద్రం వివరణ కోరింది. విదేశీ రుణాల అడ్వాన్సుల్లో 124.65 మిలియన్‌ డాలర్లు (రూ.960 కోట్లు) ఇప్పటికీ ఖర్చు చేయలేదంటూ ఈ పథకాల అమలు, వ్యయంపై సమగ్ర నివేదిక అందజేయాలని ఆదేశించింది. విదేశీ రుణాలతో చేపట్టిన ఆరు ప్రాజెక్టుల్లో నాలుగింటికి గడువు ముగిసిపోనుండగా నిధులను ఎందుకు ఖర్చు చేయలేదని ప్రశ్నించింది. ఈ మేరకు కేంద్ర ఆర్థికశాఖ విదేశీ వ్యవహారాల విభాగం ఉన్నతాధికారి లేఖ రాశారు.

ఏపీ ఆర్థికశాఖ ముఖ్య కార్యదర్శికి పంపిన ఈ లేఖలో.. రుణాల వినియోగం తీరుపై అసహనం వ్యక్తం చేశారు. విదేశీ సంస్థల నుంచి రుణాలు తీసుకుని రాష్ట్రాలు చేపడుతున్న ప్రాజెక్టులపై కేంద్రం సమీక్షించింది. తాజాగా, ఆసియా అభివృద్ధి బ్యాంకు నుంచి అడ్వాన్సుగా చెల్లించిన మొత్తాలకు సంబంధించి కేంద్రం సమీక్ష సమావేశం నిర్వహించింది.

‘వివిధ ఏజెన్సీలు ఇచ్చిన రుణాల వినియోగం తీరు ప్రోత్సాహకరంగా లేదు. పెద్దమొత్తంలో నిధులు మూలుగుతున్నాయి’ అని లేఖలో పేర్కొంది. విశాఖ-చెన్నై పారిశ్రామిక కారిడార్‌ అభివృద్ధికి పథకం ప్రాజెక్టు-1, రాష్ట్రంలో అన్ని ప్రాజెక్టులకు 24×7 విద్యుత్తు సరఫరా కోసం, 6,365 కిలోమీటర్ల గ్రామీణ రహదారుల అభివృద్ధి ప్రాజెక్టు, కరవు నివారణ పథకం, ఏపీఐఏటీ ప్రాజెక్టులకు విదేశీ సంస్థల నుంచి రుణాలు తీసుకోడానికి ఏపీ ఒప్పందాలు చేసుకుంది. ఇందులో మూడు ప్రాజెక్టుల గడువు వచ్చే ఏడాది జూన్‌, సెప్టెంబర్‌ నెలల్లో ముగియనుంది.

నిధులు ఖర్చుచేసినట్లు నివేదిక సమర్పిస్తే మిగిలిన రుణం దక్కుతుంది. నవంబరు 2018 నుంచి ఇప్పటివరకు విదేశీ ఏజెన్సీల నుంచి 455 మిలియన్‌ డాలర్ల అడ్వాన్సులు తీసుకోగా 124.652 మిలియన్‌ డాలర్లు ఖర్చు చేయలేదు. ఈ ప్రాజెక్టుల్లో కొంతమేర పనులు పూర్తయినా బిల్లులు చెల్లించలేదంటూ కాంట్రాక్టర్లు ఆందోళన చేస్తున్నారు. రుణ అడ్వాన్సులకు రాష్ట్రప్రభుత్వ మ్యాచింగు గ్రాంటు కలిపి పనులు చేయాలి.

కొన్నింటిలో గ్రాంటు జతచేయకపోగా, ఏజెన్సీలు ఇచ్చిన అడ్వాన్సుల మేరకు కూడా చెల్లింపులు సాగలేదు. దీంతో ఆయా మొత్తాలన్నీ ఇతర అవసరాలకు మళ్లించినట్లు విమర్శలు వస్తున్నాయి. ఇప్పుడు కేంద్రం ఈ వ్యవహారంపై లేఖ సంధించి పూర్తి నివేదిక కోరుతోంది.

‘‘వివిధ సంస్థలు అందజేసిన రుణ అడ్వాన్సుల వినియోగం మొత్తం అంత ప్రోత్సాహకరంగా లేదు.. ఎందుకంటే ఆంధ్రప్రదేశ్ ప్రభుత్వం ఖాతాలలో చాలా భారీ మొత్తంలో అడ్వాన్సులు పేరుకుపోయాయి.. సెప్టెంబర్ 7 నాటికి అడ్వాన్స్‌గా విడుదల చేసిన మొత్తం 124.65 మిలియన్ల డాలర్లు అంటే దాదాపు రూ. 960 కోట్లకు సమానమైన నిధులు ఉన్నాయి’’ అని కేంద్ర ఆర్ధిక శాఖ ముఖ్యకార్యదర్శి లేఖలో పేర్కొన్నారు.

Leave a Reply

Your email address will not be published. Required fields are marked *

Next Post

Andhra Bank కొత్త క్రెడిట్ కార్డు అదిరింది.. ఉచితంగానే..

Mon Sep 20 , 2021
మీరు కొత్త క్రెడిట్ కార్డు తీసుకోవాలని భావిస్తున్నారా? అయితే మీకు శుభవార్త. యూనియన్ బ్యాంక్ ఆఫ్ ఇండియా స్పెషల్ క్రెడిట్ కార్డును ఆవిష్కరించింది. దీని వల్ల పలు రకాల ప్రయోజనాలు పొందొచ్చు.