కరోనా కట్టడికి మినీ లాక్‌డౌన్‌లపై కేంద్రం సంచలన ప్రకటన.. ఇకపై కఠిన ఆంక్షలు

దేశంలో కరోనా మహమ్మారి దావానంలా వ్యాపిస్తోంది. అన్ని రాష్ట్రాలను చాపలా చుట్టేస్తోంది. ఈ నేపథ్యంలో కోవిడ్ నియంత్రణకు కఠిన చర్యలు తీసుకోవాలని రాష్ట్రాలను ఆదేశించింది.

ప్రధానాంశాలు:పాజిటివిటీ 10 శాతం దాటితే మినీ లాక్‌డౌన్.స్థానికంగానే కరోనా వైరస్ కట్టడికి చర్యలు.కఠిన ఆంక్షలు అమలు చేయాలని కేంద్రం ఆదేశం.దేశంలో అడ్డూఅదుపు లేకుండా వ్యాప్తిచెందుతున్న కరోనా మహమ్మారి కట్టడికి కఠిన చర్యలకు ఉపక్రమించింది. గత వారం రోజుల్లో పాజిటివిటీ రేటు 10% దాటిన; ఆక్సిజన్‌, ఐసీయూ బెడ్స్ 60% మించిన ప్రాంతాల్లో మినీ లాక్‌డౌన్‌ తరహా ఆంక్షలను కఠినంగా అమలు చేయాలని రాష్ట్ర ప్రభుత్వాలకు ఆదివారం రాత్రి స్పష్టం చేసింది. ఈ మేరకు కేంద్ర ఆరోగ్య శాఖ ఉత్తర్వులు జారీ చేసింది. కేసుల తీవ్రతను బట్టి పట్టణాలు, నగరాలు, జిల్లాలు, మున్సిపల్‌ వార్డులు, పంచాయతీలుగా వర్గీకరించి కఠిన నిబంధనలతో స్థానికంగా కట్టడి చర్యలు చేపట్టాలని ఆదేశించింది.

⍟ ఆ ప్రాంతాల్లో రాత్రి కర్ఫ్యూతో పాటు అత్యవసర కార్యకలాపాలు మినహా మిగిలినవాటిపై ఆంక్షలు విధించాలని స్పష్టం చేసింది. అత్యవసరం కాని కార్యకలాపాలను రాత్రిపూట పూర్తిగా నిషేధించాలని సూచించింది. సామాజిక, రాజకీయ, క్రీడా, వినోద, విద్య, సాంస్కృతిక, మత సంబంధమైన వేడుకలు, సమావేశాలను నిషేధించాలని తెలిపింది. షాపింగ్‌ కాంప్లెక్సులు, మాల్స్, సినిమా థియేటర్లు, రెస్టారెంట్లు, బార్లు, స్పోర్ట్స్ కాంప్లెక్సులు, జిమ్‌లు, స్పాలు, ఈత కొలనులు, మతపరమైన స్థలాలు పూర్తిగా మూసేయాలని పేర్కొంది.

⍟ వివాహాలకు 50 మంది, అంత్యక్రియలకు 20 మంది మించకూడదు.

⍟ ప్రజా రవాణా గరిష్ఠంగా 50% సామర్థ్యంతోనే నడవాలి. అంతర్గత లేదా అంతర్రాష్ట అత్యవసర సరకుల రవాణాపై ఎటువంటి ఆంక్షలు విధించరాదు.

⍟ వైద్య, పోలీసు, అగ్నిమాపక సేవలు, బ్యాంకులు, విద్యుత్తు, నీరు, పారిశుద్ధ్య వంటి నిత్యవసర సేవలు కొనసాగించాలి.

⍟ ప్రభుత్వ, ప్రైవేటు కార్యాలయాలన్నీ గరిష్ఠంగా 50% సామర్థ్యంతో పనిచేయాలి. ఎవరికైనా కరోనా లక్షణాలు బయటపడితే ర్యాపిడ్‌ యాంటీజెన్‌ పరీక్షలు నిర్వహించాలి.

⍟ 10% పాజిటివిటీ మించిన ప్రాంతాలన్నింటినీ ఈ ఆంక్షల పరిధిలోకి తీసుకొచ్చి 14 రోజులపాటు కొనసాగించాలి. ఏదైనా ప్రాంతాన్ని కంటెయిన్‌మెంట్‌ జోన్‌గా ప్రకటించే ముందు బహిరంగంగా వెల్లడించాలి. మాస్క్‌ ధరించడం, చేతుల శుభ్రం చేసుకోవడం, భౌతికదూరం వంటి కోవిడ్ నిబంధనల అమలుకు కఠిన చర్యలు తీసుకోవాలి.

⍟ కోవిడ్ కట్టడి చర్యల అమలుకు మాజీ సైనికోద్యోగులు, నెహ్రూ యువకేంద్ర, ఎన్‌ఎస్‌ఎస్‌ కేంద్రాలకు చెందిన సభ్యుల సేవలను ఉపయోగించుకోవాలి. కేసులు ఎక్కువగా ఉన్న ప్రాంతాల్లో ఇంటింటికీ వెళ్లి పరిశీలించి, పరీక్షలు నిర్వహించాలి. అనుమానం ఉన్నవారికి ర్యాపిడ్‌ యాంటీజెన్‌ పరీక్షలు నిర్వహించి, లక్షణాలున్నా నెగెటివ్‌ వస్తే ఆర్‌టీ-పీసీఆర్‌ పరీక్షలు నిర్వహించాలి.

⍟ ప్రభుత్వ, ప్రైవేటు, కేంద్ర శాఖలు, రైల్వే కోచ్‌లు, తాత్కాలిక ఆసుపత్రులన్నింటినీ ఉపయోగించుకోవాలి. చికిత్స ప్రొటోకాల్‌ పరిధిలో ఉన్నవారికి మాత్రమే హోం ఐసొలేషన్‌లో ఉండేందుకు అనుమతించి, ప్రత్యేకంగా ఒక కిట్‌, నిబంధనలను రూపొందించి అమలు చేయాలి.

⍟ అధిక ముప్పు కేసుల విషయంలో ప్రత్యేక పర్యవేక్షణ ఉంచి చర్యలు చేపట్టాలి. కొవిడ్‌ ఆసుపత్రుల పర్యవేక్షణ బాధ్యతలను సీనియర్‌ జిల్లా అధికారులకు అప్పగించాలి. అవసరమైన సంఖ్యలో ఆంబులెన్సులు అందుబాటులో ఉంచి, బాధితులకు ఆక్సిజన్‌ అందించేటప్పుడు కేంద్ర మార్గదర్శకాలను అనుసరించాలి. నిబంధనలకు అనుగుణంగానే రెమ్‌డెసివిర్‌, టొసిలిజుమాబ్‌ లాంటి మందులు ఇవ్వాలి.

⍟ ఆసుపత్రులవారీగా మరణాలను రోజువారీగా ఇన్సిడెంట్‌ కమాండర్‌/జిల్లా కలెక్టర్‌/ మున్సిపల్‌ కమిషనర్లు విశ్లేషించాలి. అర్హులైన వారందరికీ 100% వ్యాక్సినేషన్‌ అమలుకు అదనపు కేంద్రాలను ఏర్పాటు చేయాలి.

⍟ కఠిన ఆంక్షలపై ప్రజలను అప్రమత్తం చేసి, కంటెయిన్‌మెంట్‌ను పెద్దస్థాయిలో ప్రకటించే ముందు నిత్యావసరాలు సమకూర్చుకొనేందుకు తగిన సమయం ఇవ్వాలి. వైరస్‌ సోకిన వారు స్వయంగా వెల్లడించేలా విస్తృత ప్రచారం, హెచ్చరిక సంకేతాలు ఇవ్వాలని తెలిపింది.

⍟ కోవిడ్ పరీక్షలు ఎక్కడ చేయించుకోవాలి? వైద్య సౌకర్యాల అందుబాటు, అంబులెన్స్‌ల సమాచారంపై విస్తృత ప్రచారం చేయాలి. వేగంగా సమాచారం అందించడానికి వాట్సప్‌ గ్రూపులు ఏర్పాటు చేయాలి. అవసరమైన వారికి వైద్యసేవలు అందించడంలో జాప్యం లేకుండా చూడాలి.

Leave a Reply

Your email address will not be published. Required fields are marked *

Next Post

ఏపీ నుంచి ఆర్టీసీ బస్సులో చెన్నై వెళుతున్నారా.. మీకో అలర్ట్, ఇది తప్పనిసరి

Mon Apr 26 , 2021
శనివారం రాత్రి నుంచి ఆంక్షలను కఠినతరం చేశారని.. ఆర్టీసీ బస్సుల్లో తమిళనాడుకి ప్రయాణించేవారు ఈ–పాస్‌ను తప్పనిసరిగా పొందాలని ఏపీపీటీడీ ఆర్‌ఎం పీవీ శేషయ్య తెలిపారు.