ధరలు తగ్గించండి.. వ్యాక్సిన్ సంస్థలకు కేంద్రం రిక్వెస్ట్

Covid Vaccination in India దేశంలో కరోనా వైరస్ తీవ్రత దృష్ట్యా వ్యాక్సినేషన్ ప్రక్రియ మరింత వేగంగా జరిగేందుకు విధానాలను కేంద్రం సమీక్షించిన విషయం తెలిసిందే.

ప్రధానాంశాలు:వ్యాక్సినేషన్ విధానాన్ని సవరించిన కేంద్రం. లాభాపేక్ష లేకుండా టీకా ఇవ్వాలంటున్న రాష్ట్రాలు.కేంద్రం నుంచి ఉచితంగానే టీకాలు. కరోనా వ్యాక్సిన్‌ ధరల్లో వ్యత్యాసంపై కేంద్రాన్ని విపక్షాలు టార్గెట్ చేస్తున్నాయి. కేంద్ర ప్రభుత్వానికి అందిస్తోన్న ధరతో పోలిస్తే రాష్ట్రాలకు, ప్రైవేటు ఆస్పత్రులకు ఎక్కువ మొత్తం నిర్ణయించడం పట్ల సర్వత్రా విమర్శలు వెల్లువెత్తుతున్నాయి. ఈ నేపథ్యంలో టీకా ధరలను తగ్గించాలని సీరం ఇన్‌స్టిట్యూట్‌, భారత్‌ బయోటెక్‌‌లను కేంద్రం ప్రభుత్వం కోరింది. కేబినెట్‌ సెక్రటరీ రాజీవ్‌ గౌబా అధ్యక్షతన సోమవారం జరిగిన సమావేశంలో వ్యాక్సిన్‌ ధరలపై చర్చించినట్లు సమాచారం. దీంతో త్వరలోనే ఆ రెండు కంపెనీల ధరలు సవరించే అవకాశం ఉన్నట్లు తెలుస్తోంది.

దేశవ్యాప్తంగా మే 1 నుంచి 18 ఏళ్లు దాటిన ప్రతి ఒక్కరికీ టీకా అందజేయాలని కేంద్రం నిర్ణయించింది. అంతేకాకుండా టీకాలను రాష్ట్రాలే నేరుగా కొనుగోలు చేసుకునేలా ఆంక్షలను ఎత్తివేసింది. దీంతో రాష్ట్రాలకు, ప్రైవేటు హాస్పిటల్స్‌కు టీకా అందించే ధరలను ఉత్పత్తి సంస్థలు వెల్లడించాయి. కానీ, కేంద్రానికి ఇచ్చే ధరతో పోలిస్తే రాష్ట్ర ప్రభుత్వాలు, ప్రయివేట్ హాస్పిటల్స్‌కు ఎక్కువ ధరకు విక్రయించాలని నిర్ణయించాయి. కరోనా రెండో దశ విజృంభణతో తీవ్ర సంక్షోభాన్ని ఎదుర్కొంటున్న వేళ టీకా సంస్థలు లాభాలు ఎందుకు ఆశిస్తున్నాయనే విమర్శలు వెల్లువెత్తాయి. ఈ నేపథ్యంలో కేంద్రం జోక్యం చేసుకొని ధరలు తగ్గించే ప్రయత్నాలు చేస్తున్నట్లు సమాచారం.

సీరమ్ ఇన్‌స్టిట్యూట్ ఆఫ్ ఇండియా తయారు చేస్తున్న కోవిషీల్డ్, భారత్‌ బయోటెక్‌ అభివృద్ధి చేసిన ‘కొవాగ్జిన్‌’ ఒక్కో డోస్ కేంద్రానికి రూ.150కి అందజేస్తున్నాయి. కొవాగ్జిన్ డోస్ రాష్ట్రాలకు రూ.600గా నిర్ణయించగా, ప్రైవేటు ఆసుపత్రులకు రూ.1200గా భారత్ బయోటెక్ నిర్ణయించింది. ఇక సీరం రాష్ట్రాలకు రూ.400గా, ప్రైవేటు హాస్పిటల్స్‌కు రూ.600గా నిర్ణయించిన విషయం తెలిసిందే. వ్యాక్సిన్ ధరల్లో వ్యత్యాసంపై రాష్ట్రాల నుంచి తీవ్ర అభ్యంతరాలు వ్యక్తం కావడంతో ధరలు తగ్గించాలని ఆయా సంస్థలను కేంద్రం కోరినట్టు తెలుస్తోంది.

ఇదిలా ఉండగా, దేశంలో 18 ఏళ్లు నిండిన ప్రతి ఒక్కరికీ ఉచితంగా కొవిడ్‌ టీకా ఆందజేయడానికి ఇప్పటికే పలు రాష్ట్రాలు సంసిద్ధత వ్యక్తం చేశాయని, అందువల్ల ప్రజలపై అదనపు భారం పడే అవకాశం ఉండదని కేంద్రం అంటోంది. రాష్ట్రాలు కోరడంతోనే వ్యాక్సిన్‌పై ఇంతవరకూ ఉన్న ఆంక్షలను ఎత్తివేశామని పేర్కొంది. వ్యాక్సినేషన్‌పై ఆంక్షలను తొలగించాలని రాష్ట్రాలు డిమాండ్‌ చేయడంతోనే కొత్త విధానాన్ని ప్రకటించామని స్పష్టం చేసింది. దీనివల్ల రాష్ట్రాలు నేరుగా తయారీదారుల నుంచి టీకాలు కొనుగోలు చేసే స్వేచ్ఛ లభించిందని తెలిపింది.

Leave a Reply

Your email address will not be published. Required fields are marked *

Next Post

రూ.2 లక్షలకే అదిరిపోయే కారు.. ఇలా కొనేయండి!

Tue Apr 27 , 2021
కారు కొనేందుకు సిద్ధమయ్యారా? కొత్త కారు కాకుండా సెకండ్ హ్యాండ్ కారు అయితే బెటరని అనుకుంటున్నారా? అయితే మీకోసం ఒక ఆఫర్ అందుబాటులో ఉంది. తక్కువ ధరకే మంచి సెకండ్ హ్యాండ్ కారు కొనొచ్చు.