వింబుల్డన్ మహిళల సింగిల్స్ విజేతగా ఆష్లే బార్టీ.. 41 ఏళ్ల తర్వాత టైటిల్ నెగ్గిన తొలి ఆస్ట్రేలియన్

Ashleigh Barty ఆల్‌ ఇంగ్లాండ్‌ క్లబ్‌లో జరిగిన వింబుల్డన్ ఆఖరి సమరంలో ఆస్ట్రేలియాకు చెందిన ప్రపంచ నెంబర్‌వన్ క్రీడాకారిణి అదరగొట్టింది.

ప్రధానాంశాలు:ఆల్ ఇంగ్లాండ్ క్లబ్‌లో అదరగొట్టిన ఆష్లే బార్టీ.వింబుల్డన్ మహిళల ఫైనల్‌లో ప్లిస్కోవాపై గెలుపు.2012 తర్వాత సింగిల్స్ ఫైనల్‌లో మూడు సెట్ల పోరువింబుల్డన్ మహిళల సింగిల్స్ టైటిల్‌ను ఆస్ట్రేలియాకు చెందిన ఆష్లే బార్టీ గెలుపొందింది. శనివారం జరిగిన ఫైనల్‌లో ప్రపంచ నంబర్‌వన్ క్రీడాకారిణి బార్టీ.. చెక్ రిపబ్లిక్‌కు చెందిన కరోలినా ప్లిస్కోవాపై 6-3, 6-7 (4-7), 6-3 తేడాతో విజయం సాధించింది. 2019లో ఫ్రెంచ్‌ ఓపెన్‌ గెలిచిన బార్టీకి ఇది రెండో గ్రాండ్‌స్లామ్‌ టైటిల్‌. అంతేకాదు, 41 ఏళ్ల తర్వాత వింబుల్డన్ గెలిచిన తొలి ఆస్ట్రేలియన్‌గానూ ఘనత సాధించింది. చివరిసారిగా 1980లో ఆస్ట్రేలియాకు చెందిన ఎవోన్‌ గూలగాంగ్‌ వింబుల్డన్‌ మహిళల సింగిల్స్ టైటిల్ గెలిచింది.

చాలా ఏళ్ల తర్వాత మూడు సెట్లకు దారితీసిన మహిళల ఫైనల్‌లో.. ప్లిస్కోవాను మట్టికరిపించి వింబుల్డన్‌ టైటిల్‌ను చేజిక్కించుకుంది. మ్యాచ్ ప్రారంభం నుంచి బార్టీ దూకుడు ప్రదర్శించింది. తొలి సెట్ రెండు, నాలుగు గేముల్లో బ్రేక్‌ సాధించిన బార్టీ.. తన సర్వీసు నిలబెట్టుకుంటూ 4-0 ఆధిక్యంలో దూసుకెళ్లింది. తొలి సెట్ గెలవడం లాంఛనమే అనుకుంటున్న సమయంలో అనూహ్యంగా ప్లిస్కోవా అయిదో గేమ్‌లో బ్రేక్‌ సాధించింది. తర్వాత గేమ్‌లో బార్టీ ప్రత్యర్థి సర్వీసును బ్రేక్ చేసి 5-1 ఆధిక్యంలోకి వెళ్లింది.

ఏడో గేమ్‌లో ప్లిస్కోవా తిరిగి బ్రేక్‌ సాధించి, సర్వీసు నిలబెట్టుకుని 5-3తో నిలిచింది. తొమ్మిదో గేమ్‌లో ఎలాంటి పొరపాటుకూ తావివ్వకుండా గెలిచి సెట్‌‌ను సొంతం చేసుకుంది. రెండో సెట్‌లోనూ అదే జోరు కొనసాగించి.. బలమైన ఫోర్‌ హ్యాండ్‌ షాట్లతో విరుచుకుపడింది. మూడో గేమ్‌లోనే ప్రత్యర్థి సర్వీసు బ్రేక్‌ చేసింది. కానీ క్రమంగా ప్లిస్కోవా కూడా పుంజుకుంది. ఆరో గేమ్‌లో బ్రేక్‌తో స్కోరు సమం చేసింది. ఓ దశలో ఇద్దరు 5-5తో నిలిచారు. కీలకమైన 11వ గేమ్‌లో ప్లిస్కోవా సర్వీసును బ్రేక్‌ చేసిన బార్టీ 6-5తో టైటిల్‌ కోసం సర్వ్‌ చేయడం మొదలుపెట్టింది.

కానీ వరుసగా ఫోర్‌ హ్యాండ్‌ షాట్లు గురి తప్పడంతో దెబ్బతింది. ఆమె సర్వీను బ్రేక్‌ చేసిన ప్లిస్కోవా.. సెట్‌ను టైబ్రేక్‌కు తీసుకెళ్లింది. అక్కడ ప్లిస్కోవాదే పైచేయి. నిర్ణయాత్మక మూడో సెట్లో బార్టీ దూకుడు ముందు ప్లిస్కోవా చేతులెత్తేసింది. రెండో గేమ్‌లోనే ప్రత్యర్థి సర్వీసును బ్రేక్‌ చేసిన ప్రపంచ నంబర్‌వన్.. చివరి వరకు అదే ఆధిక్యాన్ని ప్రదర్శించి సెట్‌తో పాటు ఛాంపియన్‌షిప్‌ను గెలుచుకుంది. ఇక, 2012 తర్వాత మూడు సెట్లకు దారితీసిన మహిళల సింగిల్స్‌ వింబుల్డన్‌ ఫైనల్‌ ఇదే కావడం విశేషం. రెండుసార్లు గ్రాండ్‌స్లామ్‌ ఫైనల్స్‌కు చేరిన ప్లిస్కోవాకు రన్నరప్‌తోనే సరిపెట్టుకుంది. 2016 యుఎస్‌ ఓపెన్‌లోనూ ఆమె రన్నరప్‌గా నిలిచింది.

Leave a Reply

Your email address will not be published. Required fields are marked *

Next Post

కోపా అమెరికా కప్ విజేతగా అర్జెంటినా.. మెస్సీ సారథ్యంలో తొలి మెగా టోర్నీలో గెలుపు

Sun Jul 11 , 2021
అంతర్జాతీయ స్థాయి ఆటగాడిగా గుర్తింపు పొందినా.. అతడు జట్టులోకి వచ్చిన తర్వాత ఒక్క మేజర్ టోర్నీని కూడా అర్జెంటీనా గెలుపొందలేదు. ఎట్టకేలకు ఆ కొరత తీరిపోయింది.