విధి విచిత్రం.. ఒకప్పుడు అఫ్గన్ ఐటీ మంత్రి.. నేడు జర్మనీలో పిజా డెలివరీ బాయ్‌!

బళ్లు ఓడలు.. ఓడలు బళ్లు కావడమంటే ఇదే.. దేశానికి ఐటీ కమ్యూనికేషన్ మంత్రిగా పనిచేసిన ఆయన.. ప్రస్తుతం దేశం కాని దేశంలో ఇంటింటికి వెళ్లి పిజాలు డెలివరీ చేస్తున్నారు.

ప్రధానాంశాలు:ఏడాది కిందట మంత్రి పదవికి రాజీనామా.తాలిబన్ల ముప్పు పసిగట్టి ముందే జర్మనీకి.కుటుంబపోషణకు డెలివరీ బాయ్ ఉద్యోగం.జీవితం ఎప్పుడు ఏ మలుపు తీసుకుంటుందో.. పరిస్థతులు ఎలా మారతాయో ఊహించలేం. ప్రస్తుతం అఫ్గనిస్థాన్ ప్రజల పరిస్థితి కూడా అలాగే ఉంది. రెండు దశాబ్దాల కిందట తాలిబన్ల శకం ముగిసి ప్రజా ప్రభుత్వం ఏర్పడి సుస్థిరత దిశగా సాగుతున్న అఫ్గన్‌లో ఒక్కసారిగా పెను ఉపద్రవం వచ్చి పడింది. అక్కడ పరిస్థితులు రోజురోజుకు ఆందోళనకరంగా మారుతున్నాయి. ప్రజలు తీవ్ర భయాందోళనతో దేశం విడిచి వెళ్లేందుకు విశ్వ ప్రయత్నాలు చేస్తున్నారు. సామాన్యులే కాదు రాజకీయ నాయకులు, ప్రముఖులు కూడా తీవ్ర ఇబ్బందులు ఎదుర్కొంటున్నారు.

తాజాగా అఫ్గన్ మాజీ మంత్రి పిజ్జా డెలివరీ బాయ్‌‌గా మారారు. ఒకప్పుడు అధికారంలో ఉన్న ఆయన ఇప్పుడు ఇంటింటికి వెళ్లి పిజ్జాలు డెలివరీ చేస్తున్నారు. అఫ్గన్‌ ఐటీ శాఖ మాజీ మంత్రి సయ్యద్‌ అహ్మద్‌ షా సాదత్‌.. దేశం కాని దేశంలో పిజ్జాలు అందజేస్తారు. ఆయన స్కై మీడియాతో మాట్లాడుతూ.. ఈ దుస్థితికి గల కారణాలను వివరించారు.

‘గతేడాది దేశాధ్యక్షుడు అష్రాఫ్‌ ఘనీతో తనకు విబేధాలు, మనస్పర్థలు వచ్చాయి.. ఈ క్రమంలోనే మంత్రి పదవికి రాజీనామా చేశా.. రాజీనామా అనంతరం కొంతకాలం ప్రశాంతంగా జీవనం సాగింది.. ఇంతలోనే తాలిబన్లు దేశాన్ని ఆక్రమించుకున్నారు.. దీంతో అఫ్గన్ విడిచి జర్మనీకి కుటుంబంతో సహా చేరుకున్నాం.. నా దగ్గర ఉన్న డబ్బు ఖర్చయిపోవడంతో ప్రస్తుత పరిస్థితుల్లో డెలివరీ బాయ్‌గా ఉద్యోగం చేయాల్సి వచ్చింది’ అని తెలిపారు.

ప్రస్తుతం జర్మన్‌లోని లీప్‌జిగ్‌ పట్టణంలో పిజ్జాలు సైకిల్‌పై డెలివరీ చేస్తున్నారు. ఈ పని చేయడానికి తానేమీ సిగ్గుపడటం లేదని పేర్కొన్నారు. ఐటీ శాఖ మంత్రిగా ఉన్నప్పుడు అఫ్గనిస్థాన్‌లో మొబైల్‌ నెట్‌వర్కింగ్‌‌ అభివృద్ధి కోసం సాదత్ కృషిచేశారు. మంత్రి పదవికి రాజీనామా చేసిన అనంతరం స్వదేశంలోనే ఉన్నారు. తాలిబన్లు ఆక్రమణను పసిగట్టిన ఆయన వారం రోజుల ముందే జర్మన్‌కు వచ్చేశారు. ఇప్పుడు గడ్డు పరిస్థితులు ఎదురవడంతో కుటుంబ పోషణ కోసం విధిలేక డెలివరీ బాయ్‌ అవతారం ఎత్తారు.

ప్రస్తుతం మంత్రి ఇంటింటికి వెళ్లి పిజాలు డెలివరీ చేస్తున్న ఫోటోలు సోషల్ మీడియాలో వైరల్ అవుతున్నాయి. ఈ ఫోటోలను అల్ జజీరా అరేబియా, ఇతర స్థానిక మీడియాలు ప్రచారం చేశాయి. తొలుత అఫ్గన్ మాజీ మంత్రిని వీధుల్లో గుర్తించిన జర్మనీ జర్నలిస్ట్ ట్విట్టర్ ద్వారా ఈ విషయాన్ని పంచుకున్నారు. ‘కొద్ది రోజుల కిందట ఓ వ్యక్తిని కలిశాను.. ఆయన రెండేళ్ల కిందట అఫ్గన్ కమ్యూనికేషన్ మంత్రిగా ఉన్నానని చెప్పారు.. మీరు లిప్‌జిగ్‌లో ఏం చేస్తున్నారని అడిగితే ఫుడ్ డెలివరీ బాయ్‌గా పనిచేస్తున్నట్టు చెప్పారు’ అని ట్వీట్ చేశారు.

Leave a Reply

Your email address will not be published. Required fields are marked *

Next Post

ఆవు పాలు, గేదె పాలు.. రెండింటిలో ఏవి మంచివంటే..

Thu Aug 26 , 2021
ఆరోగ్యానికి పాలు చాలా మంచిది. పాలల్లో పోషక పదార్ధాలు సమృద్ధిగా ఉంటాయి. అలానే పాలల్లో క్యాల్షియం ఎక్కువగా ఉంటుంది. ఇది ఎముకల్ని, పళ్ళని దృఢంగా ఉంచుతుంది. డాక్టర్లు కూడా పాలని ప్రతి రోజూ తాగమని చెప్తూ ఉంటారు. పాలు తీసుకోవడం వల్ల ఆరోగ్యంగా ఫిట్ గా ఉండొచ్చు.