కన్వార్ యాత్రపై పునరాలోచిస్తారా.. మేమే నిర్ణయం తీసుకోవాలా: యూపీకి సుప్రీం అల్టిమేటం

కరోనా మూడో దశ వ్యాప్తి ముప్పు పొంచి ఉందని నిపుణులు హెచ్చరిస్తుంటే.. యూపీ ప్రభుత్వం కన్వార్ యాత్రకు అనుమతించడం పట్ల విస్మయం వ్యక్తమవుతోంది.

ప్రధానాంశాలు:కన్వార్ యాత్రకు అనుమతించిన యూపీ ప్రభుత్వం.సుమోటాగా స్వీకరించిన విచారణ చేపట్టిన సుప్రీం.కరోనా కాలంలో యాత్రలేంటన్న న్యాయస్థానంకన్వార్ యాత్రకు అనుమతి విషయంలో పునరాలోచించాలని యూపీ ప్రభుత్వాన్ని సర్వోన్నత న్యాయస్థానం ఆదేశించింది. కరోనా సమయంలో కన్వార్ యాత్రకు యోగి ఆదిత్యనాథ్ ప్రభుత్వం అనుమతించడాన్ని సుప్రీంకోర్టు తీవ్రంగా తప్పుబట్టింది. ‘పౌరుల జీవన హక్కుల్లో ఆరోగ్యం చాలా ముఖ్యమైంది.. మతపరమైన అన్ని ఇతర భావాలు ఈ ప్రాథమిక హక్కుకు లోబడి ఉంటాయి’ అని వ్యాఖ్యానించింది. కన్వార్ యాత్రకు యూపీ ప్రభుత్వం అనుమతించడాన్ని సుప్రీంకోర్టు సుమోటాగా స్వీకరించింది.

‘ఇది మనందరికీ సంబంధించింది.. జీవించడం అనేది ప్రాథమిక హక్కులకు హృదయం వంటిది.. భారత పౌరుల ఆరోగ్యం, జీవన హక్కు చాలా ముఖ్యం..మతపరమైన సహా అన్ని ఇతర అంశాలు ఈ ప్రాథమిక హక్కుకు లోబడి ఉంటాయి’ అని జస్టిస్ ఆర్ఎఫ్ నారీమన్, బీఆర్ గవాయ్ ధర్మాసనం స్పష్టం చేసింది. తదుపరి విచారణను వచ్చే సోమవారానికి వాయిదా వేసింది.

‘కన్వార్ యాత్ర నిర్వహణ విషయంలో పునరాలోచించాలని మరో అవకాశం ఇస్తున్నాం.. లేకపోతే తదుపరి నిర్ణయం మేం తీసుకుంటాం.. మనమంతా భారతీయులమే.. రాజ్యాంగంలోని ఆర్టికల్ 21 ప్రకారం ఈ అంశాన్ని సుమోటాగా స్వీకరించాం.. ఇది అందరికీ వర్తిస్తుంది’ అని ఘాటు వ్యాఖ్యలు చేసింది. ఇది ఎంతో ప్రతిష్టాత్మకమైన యాత్రని, పూర్తిగా వ్యాక్సినేషన్ వేసుకున్న భక్తులనే అనుమతిస్తామని ధర్మాసనానికి యూపీ ప్రభుత్వం ఈ సందర్భంగా తెలియజేసింది.

‘ఈ అంశంపై యూపీ విపత్తు నిర్వహణ యంత్రాంగం చర్చించింది.. పూర్తిగా టీకా తీసుకున్న వారినే అనుమతిస్తాం.. యాత్ర జరిగే ప్రాంతాల్లో గంగా జలాన్ని ట్యాంకులతో ఉంచుతాం’ అని యూపీ ప్రభుత్వం తరఫున సీనియర్ లాయర్ సీఎస్ వైద్యనాథన్ వివరించారు. ఈ సందర్భంగా ధర్మాసనం స్పందిస్తూ.. మనమంతా భారతీయులమని, జీవించే హక్కును కల్పించే ఆర్టికల్ 21 అందరికీ వర్తిస్తుంది.. కాబట్టి యూపీ ప్రభుత్వం 100 శాతం ఈ యాత్రకు భక్తులను అనుమతించడం సమంజసం కాదు’ అని స్పష్టం చేసింది.

కేంద్ర ప్రభుత్వం తరఫున సొలిసిటర్ జనరల్ తుషార్ మెహతా హాజరయ్యారు. ప్రజల ఆరోగ్యంతోపాటు మతపరమైన మనో భావాలను పరిగణనలోకి తీసుకోవాలని కోరారు. ‘ఇది పురాతనమైన ఆచారం.. మతపరమైన మనోభావాలను పరిగణనలోకి తీసుకుంటే.. పవిత్ర గంగా జలాన్ని ట్యాంకర్ల ద్వారా అందుబాటులో ఉంచడానికి రాష్ట్రాలు ఒక వ్యవస్థను ఏర్పాటు చేయాలి. భౌతిక దూరం వంటి కోవిడ్ నిబంధనలు కచ్చితంగా అమలు చేసి గంగాజల పంపిణీ చేపట్టాలి’ అని పేర్కొన్నారు.

కన్వార్ యాత్రకు అనుమతించడాన్ని గతవారం యూపీ ప్రభుత్వానికి సుప్రీంకోర్టు నోటీసులు జారీచేసింది. గతేడాది కరోనా తొలి దశ వ్యాప్తి నేపథ్యంలో యాత్రను రద్దుచేశారు. ఏటా ఉత్తరాది రాష్ట్రాలకు చెందిన 30 మిలియన్ల మందికిపైగా శివ భక్తులు పవిత్ర గంగాజలం కోసం కాలినడకన హరిద్వార్‌కు చేరుకుంటారు. ఈ పవిత్ర గంగాజలంతో తమ ప్రాంతాల్లోని శివాలయంలో అభిషేకం చేస్తారు. పదిహేను రోజుల పాటు జరిగే ఈ యాత్ర శ్రావణ మాసంలో ప్రారంభమవుతుంది. ఈ ఏడాది జులై 25 నుంచి ఆగస్టు తొలివారం వరకు నిర్వహించనున్నారు.

Leave a Reply

Your email address will not be published. Required fields are marked *

Next Post

కొత్త గ్యాస్ సిలిండర్లు అదిరిపోయాయ్.. తీసుకుంటే లాభాలివే!

Fri Jul 16 , 2021
మీరు ఇండేన్ గ్యాస్ సిలిండర్ వాడుతున్నారా? అయితే మీకు శుభవార్త. మీకోసం కొత్త గ్యాస్ సిలిండర్లు అందుబాటులోకి వచ్చాయి. వీటి వల్ల ప్రధానంగా రెండు బెనిఫిట్స్ పొందొచ్చు. ఇవి హైదరాబాద్‌లో అందుబాటులో ఉన్నాయి.